2 ліпеня, Позірк. Новы гістарычны тэмпературны максімум дня зафіксаваны ў Беларусі 1 ліпеня, сведчыць праведзены “Позіркам“ параўнальны аналіз аператыўных і даступных архіўных даных Белгідрамета.
У Кобрыне паветра прагрэлася да 37,1 градуса. Ранейшы рэкорд пратрымаўся 7 гадоў (36,4 градуса ў Брагіне).
У двух гарадах перакрытыя экстрэмумы не толькі дня, але і месяца. У Пружанах і Івацэвічах тэмпература дасягнула 36,1 градуса. У першым горадзе ліпеньскі рэкорд складаў 36 градусаў (31 ліпеня 1994 года), у другім — 35,6 (17 ліпеня 2001 года).
Усяго мінулым днём рэкорды адзначаны ў 9 гарадах, у тым ліку Брэсце і Гродне.
2 ліпеня Белгідрамет прагназуе да 33 градусаў на паўднёвым усходзе. Рэкорд дня — 34,1 градуса ў Стоўбцах у 2016 годзе. На гэтым перыяд анамальна гарачага надвор’я, які пачаўся 27 чэрвеня, завершыцца.
29 чэрвеня быў зафіксаваны тэмпературны рэкорд за ўвесь 145-гадовы перыяд інструментальных метэаназіранняў на тэрыторыі Беларусі — 40,4 градуса (у Пінску).
