МЗС высвятляе, ці маюцца беларусы сярод пацярпелых у аўтамабільнай аварыі ў Батумі

25 ліпеня, Позірк. Міністэрства замежных спраў правярае інфармацыю, якая з’явілася 25 ліпеня ў медыяпрасторы, пра тое, што грамадзяне Беларусі пацярпелі ў выніку аўтамабільнай аварыі ў Батумі (Грузія), вынікае з паведамленняў дзяржСМІ.

Паводле інфармацыі грузінскага рэгіянальнага інтэрнэт-выдання Ajara Times, суботнім ранкам на скрыжаванні вул. Гаргіладзэ і Важа-Пшавела ў Батумі сутыкнуліся мікрааўтобус з турыстычнай групай і легкавы аўтамабіль. Ад удару першы перавярнуўся, а другі ўрэзаўся ў сцяну Батумскага ўніверсітэта мастацтваў.

У выніку аварыі пацярпела каля дзясятка чалавек, двое загінула на месцы.

Паведамлялася, што МУС Грузіі распачало расследаванне паводле арт. 276 КК (парушэнне правілаў бяспекі дарожнага руху ці эксплуатацыі транспарту).

У розных крыніцах з’явілася інфармацыя пра тое, што мікрааўтобус перавозіў грамадзян Беларусі.