Беларусы, якія знаходзіліся ў аўтобусе Мінск — Анапа, перавезеныя ў Гомельскую вобласць

2 ліпеня, Позірк. Грамадзяне Беларусі, якія знаходзіліся ў атакаваным БПЛА турыстычным аўтобусе Мінск — Анапа, перавезеныя з Бранскай вобласці ў Гомельскую. Пра гэта паведаміў у сваім тэлеграм-канале в.а. губернатара расійскага рэгіёну Ягор Кавальчук.

Чыноўнік усклаў адказнасць за інцыдэнт на Украіну. “У выніку мэтанакіраванага ўкраінскага ўдару па грамадзянскіх асобах аскепкавыя раненні атрымалі два кіроўцы аўтобуса. На месца неадкладна прыбыла медыцынская брыгада, была аказана неабходная дапамога“, — напісаў Кавальчук.

Ён паведаміў, што “з пасажырамі ў пункце часовага размяшчэння (ПЧР) працавалі псіхолагі, ім было забяспечана гарачае харчаванне”. Шасцёра расіян, дадаў кіраўнік рэгіёну, “па-ранейшаму знаходзяцца ў ПЧР, дзе створаныя ўсе неабходныя ўмовы”.

Раней расійскія і беларускія СМІ і тэлеграм-каналы паведамілі пра ўдар беспілотніка па аўтобусе Мінск — Анапа ў пункце пропуску Чырвоны камень на мяжы Гомельскай і Бранскай абласцей.

Адзначалася, што ўдар быў нанесены 2 ліпеня ў 11:55 у раёне населенага пункта Чырвоная гара Бранскай вобласці. У аўтобусе знаходзілася 19 пасажыраў.

Два кіроўцы, ураджэнцы Гомельскай вобласці, атрымалі лёгкія раненні. Ім была аказана медыцынская дапамога.

Першымі пра атаку паведамілі расійскія тэлеграм-каналы, якія распаўсюджваюць інсайдэрскую інфармацыю і, як мяркуецца, звязаныя са спецслужбамі РФ. Яны абвінавацілі ў тым, што адбылося, Узброеныя сілы Украіны.

17 чэрвеня аўтобус з выхаванцамі Рэчыцкай дзіцяча-юнацкай спартыўнай школы № 2 (Гомельская вобласць) трапіў пад удар у Бранскай вобласці РФ. У транспартным сродку, які рухаўся з Рэчыцы ў Геленджык, знаходзіліся 44 пасажыры, з іх 28 дзяцей-спартсменаў 2014–2015 гадоў нараджэння. Там жа былі ўдзельнікі мясцовай танцавальнай студыі.

Сярод людзей, якія суправаджалі дзяцей, была жонка трэнера з Рэчыцкай ДЮСШ-2 Вікторыя Гарошка, яна загінула.

Расійскі і беларускі бакі абвінавацілі ў атацы Украіну, у Кіеве дачыненне да інцыдэнту адмаўляюць.