У Літве перахопленая адна з найбуйнейшых у 2026 годзе партый нелегальных цыгарэт — з беларускімі акцызнымі маркамі, але, імаверна, падробленымі
14 лістапада, Позірк. Адну з найбуйнейшых у 2026 годзе партый нелегальных цыгарэт перахапілі ў панядзелак, 9 лістапада, супрацоўнікі Крымінальнай службы мытні (КСМ), паведаміў праз чатыры дні Мытны дэпартамент пры Міністэрстве фінансаў Літвы.
Паводле інфармацыі ведамства, у той дзень у ваколіцах Марыямпале (горад на паўднёвым захадзе краіны) быў спынены грузавік DAF. Кіроўца паведаміў супрацоўнікам КСМ, што перавозіць у Германію партыю прамысловых катлоў. Насамрэч паўпрычэп быў цалкам загружаны нелегальнай тытунёвай прадукцыяй — агулам 792 скрыні.
“Падлік тытунёвых вырабаў завяршылі толькі ў аўторак, — гаворыцца ў паведамленні. — Высветлілася, што ў затрыманым DAF знаходзілася 396 тыс. пачкаў цыгарэт Winston Blue з беларускімі акцызнымі маркамі. Паводле папярэдняй ацэнкі, кошт цыгарэт з улікам падаткаў можа перавышаць 2 млн еўра”.
Супрацоўнікі ведамства падазраюць, што беларускія акцызныя маркі на пачках цыгарэт падробленыя. “У апошнія гады сітуацыя на ценявым рынку тытунёвых вырабаў імкліва змяняецца: большая частка цыгарэт, якія вымаюць супрацоўнікі КСМ у рамках дасудовых расследаванняў, звычайна выяўляецца ўвезенай з Латвіі. Мяркуецца, што там жа падрабляюць і беларускія акцызныя маркі”, — адзначыла мытня.
Кіроўца фуры — грамадзянін Літвы — быў затрыманы на двое сутак. Распачатае дасудовае расследаванне па факце “незаконнага распараджэння падакцызнымі таварамі”.
“Гэта адна з найбуйнейшых партый нелегальных цыгарэт, затрыманых сёлета супрацоўнікамі КСМ. Такім спосабам нелегальныя тытунёвыя вырабы перавозяць толькі добра арганізаваныя злачынныя структуры. Каб даставіць у Літву на паветраных шарах такую колькасць цыгарэт, якая змясцілася ў адной фуры (792 скрыні), спатрэбілася б ад 130 да 260 паветраных шароў (на адным паветраным шары звычайна перавозяць ад трох да шасці скрынь цыгарэт)”, — гаворыцца ў паведамленні.
Ад пачатку 2026 года супрацоўнікі КСМ у рамках дасудовых расследаванняў вынялі каля 3 млн пачкаў нелегальных цыгарэт, большая частка якіх была ўвезеная з Латвіі. Агульны кошт з улікам абавязковых да выплаты ў Літве падаткаў — каля 15 млн еўра.
