21-гадовая мінчанка абвінавачваецца ў збыце псіхатропаў, якія прывялі да смерці жыхара Бабруйска

13 лістапада, Позірк. Аб накіраванні ў суд крымінальнай справы 21-гадовай мінчанкі, абвінавачанай у незаконным абароце псіхатропных рэчываў, якія прывялі да смерці 25-гадовага жыхара Бабруйска, паведаміла 13 лістапада прэс-служба Генеральнай пракуратуры.

Паводле звестак нагляднага ведамства, у снежні 2025 года дзяўчына адгукнулася ў адным з месенджараў на прапанову працаваць закладніцай псіхатропных рэчываў у інтэрнэт-наркамаркеце. З лютага 2026 года яна займалася супрацьпраўнай дзейнасцю ў Мінску, Бабруйскім і Магілёўскім раёнах.

У лютым абвінавачаная абсталявала ў сталіцы схованкі з амфетамінам агульнай масай 640 г і пара-метылэфедронам масай 8,59 г. Пасля гэтыя рэчывы канфіскавалі праваахоўныя органы.

Пазней дзяўчына пакінула ў схованках на тэрыторыі Магілёўскага раёна яшчэ 8,59 г пара-метылэфедрону. Наркотык набылі чатыры чалавекі, якія пасля былі прыцягнутыя да крымінальнай адказнасці за незаконнае набыццё і захоўванне асабліва небяспечных псіхатропных рэчываў без мэты збыту (ч. 1 арт. 328 КК).

У канцы сакавіка адну з закладак з пара-метылэфедронам на тэрыторыі Бабруйскага раёна набыў 25-гадовы мясцовы жыхар. Ад вострага атручвання псіхатропнымі рэчывамі ён памёр у лясным масіве.

У канцы красавіка дзяўчыну затрымалі ў Мінску пасля таго, як яна перавезла праз мяжу 101,58 г асабліва небяспечнага псіхатропнага рэчыва MDMB(N)-2201, прызначанага для продажу праз ценявую інтэрнэт-краму.

Крымінальная справа расследавала ўпраўленне Следчага камітэта па Магілёўскай вобласці.

Дзяўчыне інкрымінуецца незаконныя набыццё, захоўванне, перавозку і збыт асабліва небяспечных псіхатропных рэчываў у буйным памеры ў складзе арганізаванай групы, якія пацягнулі па неасцярожнасці смерць чалавека (ч. 5 арт. 328 КК), а таксама незаконнае перамяшчэнне забароненых рэчываў праз дзяржаўную мяжу (ч. 3 арт. 328¹ КК).

Пакаранне па першай са згаданых артыкулаў складае ад 12 да 25, па другой — ад 7 да 12 гадоў пазбаўлення волі, у абодвух выпадках — са штрафам або без штрафу.

Абвінавачаная знаходзіцца пад вартай.