Камандуючы УСУ: Мінск зноў уключаў адзін рэтранслятар на мяжы
1 ліпеня, Позірк. Беларускі бок не дэмантаваў рэтранслятары, якія дапамагаюць наводзіць расійскі дроны на ўкраінскую тэрыторыю, аднак яны былі выключаныя на некаторы час, заявіў у інтэрв’ю каналу ТСН галоўнакамандуючы Узброенымі сіламі Украіны Аляксандр Сырскі 30 чэрвеня.
“Учора Беларусь уключыла адзін рэтранслятар, але, я думаю, больш яны іх уключаць не будуць. <…> [Беларускія ўлады] усвядомяць, што гэтага не трэба рабіць, скажам так”, — сказаў ён.
Сырскі даў зразумець, што ва Украіны дастаткова спосабаў для таго, каб не баяцца дзеянняў з паўночнага напрамку, а таксама зрабіць немагчымым палёты БПЛА праціўніка ўздоўж мяжы.
Паводле спікера, расійскія ўлады “пралічаць розныя варыянты вядзення наступальнай аперацыі ва Украіну, у тым ліку з тэрыторыі Беларусі з мэтай захопу Кіева і іншых тэрыторый”.
Пры гэтым Сырскі выказаў сумневы ў гатоўнасці Мінска зноў прадаставіць сваю тэрыторыю для наступлення: “Наколькі [такія планы] рэалістычныя, улічваючы апошнія падзеі… Я думаю, што кіраўніцтва Беларусі не вырашыцца выкарыстоўваць уласную тэрыторыю, даваць яе агрэсару для выкарыстання і ў якасці плацдарму для правядзення наступальнай аперацыі”.
Найбольш рэалістычным глаўкам назваў сцэнар нападу з Бранскай вобласці РФ на Чарнігаўскую вобласць.
Паводле інфармацыі Сырскага, зараз “ніякага засяроджвання войскаў з боку Беларусі не назіраецца”.
Спікер, разважаючы аб магчымых тэмах, якія маглі абмяркоўваць на нядаўняй сустрэчы Пуцін і Лукашэнка, выказаў меркаванне, што гаворка ішла аб “няпростай сітуацыі, якая зараз склалася”.
19 чэрвеня прэзідэнт Украіны Уладзімір Зяленскі даў Аляксандру Лукашэнку тыдзень на зняцце з вышак рэтранслятараў для навядзення расійскіх дронаў уздоўж мяжы з Украінай: “Калі ён гэта не зробіць, зробім мы”. Палітык таксама заклікаў спыніць пастаўку нафтапрадуктаў расійскага войска.
На наступны дзень у звароце да суайчыннікаў ён заявіў, што Украіне вядома “пра чатыры такія рэтранслятары ў Беларусі — у Гомельскай і Брэсцкай абласцях”, і паўтарыў, што ў Беларусі “ёсць час, каб дэмантаваць гэтае абсталяванне”.
24 чэрвеня Зяленскі паведаміў, што абсталяванне спыніла працу двума днямі раней: “Дэмантавалі [рэтранслятары] ці не, я, шчыра кажучы, пакуль не ведаю. Але мы працуем над гэтым, і я вельмі ўважліва сачу і штодзённыя даклады атрымліваю. Факт, што рэтранслятары на сёння не працуюць”.
Днём пазней кіраўнік украінскай дзяржавы запатрабаваў спыніць развіццё прыгранічнай інфраструктуры агрэсіі з боку Мінска.
Амбасадар МЗС Украіны па асобых даручэннях, які адказвае за сувязі з беларускімі дэмсіламі, Яраслаў Чарнагор заяўляў, што раней рэтранслятары на беларускай мяжы ўжо былі знішчаны Кіевам, тэма не ўзнімалася ў публічнай прасторы, аднак Крэмль зноў устанавіў аналагічнае абсталяванне.
