Баскетбольныя федэрацыі 10 краін перасцераглі ФІБА ад допуску спартсменаў з Беларусі і Расіі з нацсімволікай

18 чэрвеня, Позірк. Дзесяць нацыянальных баскетбольных федэрацый звярнуліся ў Міжнародную федэрацыю баскетбола (ФІБА) з нагоды магчымага ўдзелу Расіі і Беларусі пад сваімі дзяржаўнымі сімваламі ў чэмпіянаце свету па баскетболе фармату 3х3 сярод гульцоў да 23 гадоў.

Як адзначаецца, у прыватнасці, на літоўскім сайце basketnews, прадстаўнікі Даніі, Ісландыі, Латвіі, Літвы, Нарвегіі, Польшчы, Украіны, Фінляндыі, Швецыі і Эстоніі звяртаюць увагу, што, хоць канчатковае рашэнне аб удзеле гэтых краін у згаданым чэмпіянаце яшчэ не прынятае, расійскім і беларускім камандам ужо дазволена ўдзельнічаць у спаборніцтвах Лігі нацый па баскетболе фармату 3х3 сярод гульцоў да 21 года, якія пройдуць у ліпені. Паспяховае выступленне на іх дае магчымасць кваліфікавацца на чэмпіянат свету U23, які запланаваны на 15-19 верасня.

У сумеснай заяве падкрэсліваецца, што “праз больш за чатыры гады пасля пачатку расійскага ўварвання ва Украіну вайна працягваецца”. Украінскія спартсмены, трэнеры і спартовыя арганізацыі “працягваюць пакутаваць ад наступстваў расійскай агрэсіі, а Беларусь застаецца прыхільнікам і хаўруснікам гэтай агрэсіі“.

“Мы перакананыя, што ўдзел нацыянальных зборных Расіі і Беларусі ў міжнародных баскетбольных спаборніцтвах пад іх нацыянальнымі сцягамі, гімнамі і сімволікай з’яўляецца непрымальным і супярэчыць прынцыпам адказнасці, салідарнасці і павагі, на якіх заснаваны міжнародны спорт“, — гаворыцца ў заяве.

На думку аўтараў, нацыянальным зборным Расіі і Беларусі “не павінен быць дазволены ўдзел у спаборніцтвах ФІБА з выкарыстаннем нацыянальнай сімволікі датуль, пакуль працягваецца вайна супраць Украіны“.

“Калі ФІБА прыме пастанову дапусціць нацыянальныя зборныя Расіі і Беларусі да ўдзелу ў фінальным этапе чэмпіянату свету ФІБА фармату 3х3 ва ўзросце да 23 гадоў пад іх дзяржаўнымі сцягамі і нацыянальнай сімволікай, мы паведамляем ФІБА, што федэрацыі, якія падпісалі гэтую заяву, не выключаюць магчымасці адмовіцца ад удзелу ў любых матчах супраць гэтых нацыянальных зборных і пакідаюць за сабой права распачаць адпаведныя захады ў адпаведнасці са сваёй палітыкай і прынцыпамі“, — гаворыцца ў дакуменце.

Падпісанты адзначаюць, што, хоць заява тычыцца канкрэтнага чэмпіянату, яна адлюстроўвае іх “больш шырокую пазіцыю наконт ўдзелу нацыянальных зборных Расіі і Беларусі ў міжнародных баскетбольных спаборніцтвах датуль, пакуль працягваецца вайна супраць Украіны“.

Аб “выключным” дазволе Беларусі і Расіі заявіць моладзевыя каманды сваіх краін для ўдзелу ў моладзевай Лізе нацый па баскетболе фармату 3х3 ФІБА паведаміла 23 красавіка. У абгрунтаванні ўтрымліваецца спасылка на рэкамендацыі Міжнароднага алімпійскага камітэта.

Паведамляецца, што адпаведныя турніры ў найбліжэйшы час пройдуць у Кітаі і Малайзіі.

Пры гэтым канстатуецца, што выканкам ФІБА “зацвердзіў захаванне бягучага статусу расійскіх і беларускіх каманд для ўсіх астатніх спаборніцтваў, уключаючы моладзевыя Еўрабаскеты-2026, да наступнага пасяджэння выканаўчага камітэта, запланаванага на верасень 2026 года“.

28 лютага 2022 года, праз некалькі дзён пасля пачатку вайны, МАК заклікаў спартыўныя федэрацыі не дапускаць да спаборніцтваў атлетаў з РФ і Беларусі. Гэтая рэкамендацыя была неадкладна і масава прынятая да выканання, у выніку чаго расейскі і беларускі спорт апынуўся амаль у поўнай ізаляцыі.

28 сакавіка 2023 года МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах пры выкананні шэрагу ўмоў.

Сёлета 7 траўня выканкам МАК заявіў, што “больш не рэкамендуе якія-небудзь абмежаванні на ўдзел беларускіх спартсменаў, уключаючы каманды, у спаборніцтвах, якія праводзяцца міжнароднымі федэрацыямі і арганізатарамі міжнародных спартыўных мерапрыемстваў”.

Адзначалася, што МАК “скасаваў рэкамендаваныя ўмовы ўдзелу для міжнародных федэрацый і арганізатараў міжнародных спартыўных мерапрыемстваў ад 28 лютага 2022 года і 28 сакавіка 2023 года ў той частцы, якая тычыцца Беларусі і беларускіх спартсменаў“.

Пасля гэтага аб допуску беларускіх спартсменаў на свае спаборніцтвы на роўных умовах з прадстаўнікамі іншых краін заявілі аб’яднанні па каратэ, гімнастыцы, фехтаванні, веласпорце, спартыўных танцах, більярдзе, водных лыжах, боксе, тайскім боксе, сучасным пяцібор’і і валейболе, парусным спорце, барацьбе, а таксама Міжнародная федэрацыя студэнцкага спорту, пад эгідай якой у 2027 годзе адбудуцца летняя і зімовая ўніверсіяды.

Захаваныя абмежаванні ў дачыненні да беларускіх лёгкаатлетаў, тэнісістаў і іншых спартсменаў, а зборныя па футболе і футбольныя клубы па-ранейшаму праводзяць хатнія міжнародныя афіцыйныя гульні на нейтральных палях.