Намеснік кіраўніка МЗС Сякрэта ў АБСЕ: Беларусь не хоча вайны, мы хочам супрацоўнічаць, будаваць дарогі і прадпрыемствы
17 чэрвеня, Позірк. Беларусы “не прымаюць вайну як ніякі іншы народ, таму што не па чутках ведаюць цану міру”, заявіў намеснік міністра замежных спраў Ігар Сякрэта, выступаючы 17 чэрвеня ў Вене на штогадовай канферэнцыі АБСЕ па аглядзе праблем у галіне бяспекі.
“Беларусь не хоча вайны”, — цытуе Сякрэту прэс-служба МЗС.
“Мы хочам супрацоўнічаць. Мы хочам будаваць дарогі, прадпрыемствы і лагістычныя маршруты. Мы хочам бачыць вакол сябе прадказальных і паспяховых суседзяў”, — сказаў намеснік кіраўніка ведамства.
Паводле яго слоў, Мінск у рамках АБСЕ выступае “за аднаўленне сур’ёзнага прафесійнага дыялогу — без бясконцых узаемных абвінавачванняў і палітычнага піяру, без папярэдніх умоў і спробаў чытаць адзін аднаму лекцыі”.
Ён заклікаў краіны, якія ўваходзяць у арганізацыю, “аднавіць кантакты і камунікацыі па ваеннай лініі”, паколькі “праз іх спыненне рэзка ўзрасла рызыка памылак, небяспечных інцыдэнтаў, няслушнага ўспрымання і ілжывых высноў”.
“Неабходна вяртацца да механізмаў празрыстасці і кантактаў на любым прымальным узроўні аж да тактычнага ўзаемадзеяння ў прыгранічных раёнах”, — заявіў дыпламат.
Заклікі намесніка кіраўніка МЗС да міру прагучалі на фоне фактычнага саўдзелу Беларусі ў распачатай у лютым 2022 года ваеннай агрэсіі Расіі ў дачыненні да Украіны.
Пра жаданне мець “прадказальных суседзяў” дыпламат заявіў падчас міграцыйнага крызісу, які з вясны 2021-га працягваецца на межах Беларусі і краін ЕС.
