Ніжнія палаты парламентаў Беларусі і Алжыра аформяць супрацу мемарандумам

23 траўня, Позірк. Парламенцкая дэлегацыя Алжыра на чале са старшынёй Нацыянальнага народнага сходу Ібрагімам Бугалі 23–26 траўня здзяйсняе афіцыйны візіт на запрашэнне Палаты прадстаўнікоў Нацыянальнага сходу (ПП НС) — упершыню ў гісторыі двухбаковых стасункаў.

Паводле інфармацыі прэс-службы ніжняй палаты беларускага парламента, алжырскія калегі сустрэнуцца з кіраўніцтвам ПП НС, наведаюць “прамысловыя і сельскагаспадарчыя прадпрыемствы, а таксама культурна-гістарычныя аб’екты”.

“Прадугледжваецца абмеркаванне шырокага спектра пытанняў міжпарламенцкага ўзаемадзеяння, а таксама двухбаковай супрацы ў палітычнай, гандлёва-эканамічнай і гуманітарнай сферах, — гаворыцца ў паведамленні. — Вынікам візіту стане падпісанне мемарандума аб супрацы паміж Палатай прадстаўнікоў Нацыянальнага сходу Рэспублікі Беларусь і Нацыянальным народным сходам парламента Алжырскай Народнай Дэмакратычнай Рэспублікі”.

Імаверна, падпісанне мемарандума заклікана інстытуцыяналізаваць ужо наладжаныя кантакты паміж ніжнімі палатамі парламентаў дзвюх краін, паколькі, згодна з інфармацыяй ПП НС, супраца ўжо “развіваецца па двухбаковай лініі і ў рамках узаемадзеяння ў міжнародных парламенцкіх арганізацыях”.

У парламентах абедзвюх краін “дзейнічаюць групы сяброўства”, якія абменьваюцца візітамі і праводзяць пасяджэнні праз відэасувязь, “абмяркоўваючы пытанні гандлёва-эканамічнага ўзаемадзеяння, рэалізацыі дамоўленасцей на найвышэйшым узроўні”. Адзначаецца, што дэпутаты ПП НС “падключыліся да працы сумеснай Беларуска-Алжырскай камісіі па гандлёва-эканамічнай і навукова-тэхнічнай супрацы”.

Аляксандр Лукашэнка наведваў Алжыр у снежні 2025 года — паміж пералётамі ў Аман. Пасля перагавораў з алжырскім прэзідэнтам Абдэльмаджыдам Тэбунам госць заявіў пра дасягнутую дамоўленасць давесці тавараабарот з Алжырам да 500 млн долараў. Пры гэтым прэс-служба візіцёра прыводзіла статыстыку двухбаковага гандлю, згодна з якой па выніках 2024 года ўзаемны тавараабарот склаў “крыху больш за 49 млн долараў, з якіх практычна ўвесь аб’ём — гэта беларускі экспарт”.

Дыпламатычныя стасункі паміж Беларуссю і Алжырам усталяваныя 24 кастрычніка 1995 года.

На сайце беларускай амбасады ў Егіпце, якое курыруе ў тым ліку стасункі з Алжырам, апошнія даныя па тавараабароце састарэлі на пяць гадоў. Яны паказвалі на рэзкае падзенне і мізэрныя аб’ёмы двухбаковага гандлю — з 13,2 млн долараў у 2020 годзе да 1,01 млн у 2021-м (у абодвух выпадках — толькі беларускі экспарт).

Асноўныя экспартныя пазіцыі Беларусі на той момант: калійныя ўгнаенні, тэкстыльныя матэрыялы, прасякнутыя ці пакрытыя пластмасамі, папера газетная, канцылярскія вырабы.