Лукашэнка падпісаў указы аб вытворчасці і абароце алкаголю і аб вывазных пошлінах на гарбарную сыравіну
4 траўня, Позірк. Указ “Аб вытворчасці і абароце алкагольнай, нехарчовай спіртазмяшчальнай прадукцыі, нехарчовага этылавага спірту” падпісаў 4 траўня Аляксандр Лукашэнка, паведамляе яго прэс-служба.
Дакумент, як заяўлена, накіраваны на “ўдасканаленне дзеючай сістэмы ўвозу алкагольнай прадукцыі”.
Указам сярод іншага зацверджаны “склад і палажэнне аб Каардынацыйнай групе па вытворчасці і абароту алкагольнай, нехарчовай спіртазмяшчальнай прадукцыі, нехарчовага этылавага спірту”.
Зацверджана палажэнне аб парадку арганізацыі і правядзення конкурсаў на вызначэнне юрыдычных асоб, якія “забяспечваюць рэалізацыю выключнага права дзяржавы на ажыццяўленне імпарту алкагольнай прадукцыі”.
Палажэннем, як адзначаецца, устанаўліваюцца “патрабаванні да ўдзельнікаў конкурсу, парадак прадстаўлення конкурсных прапаноў, іх ацэнкі Каардынацыйнай групай і вызначэння пераможцаў конкурсу“.
Таксама 4 траўня Лукашэнка падпісаў указ “Аб вывазных мытных пошлінах на гарбарную сыравіну”, дакумент прыняты ў мэтах “павышэння канкурэнтаздольнасці гарбарных тавараў на знешніх рынках і павелічэння аб’ёмаў рэалізацыі прадукцыі”.
Указ прадугледжвае вызваленне ў 2026–2027 гадах ад выплаты вывазной мытнай пошліны на паўфабрыкат дублёны, які вывозіцца з тэрыторыі Беларусі за межы ЕАЭС.
Пастановай Міністэрства фінансаў №18 ад 16 красавіка 2026 года з 7 да 10 капеек (на 42,9%) падвышаны кошт акцызных марак для алкагольнай прадукцыі. Кошт акцызнай маркі для імпартных алкагольных напояў, на ўвоз якіх не распаўсюджваецца выключнае права дзяржавы, падвышаны ў 3,3 раза (з 3 да 10 рублёў).
Новыя тарыфы ўступілі ў сілу 2 траўня.
“Абклеіць увозімую алкагольную прадукцыю беларускімі акцызнымі маркамі можна толькі на мытных складах або складах часовага захоўвання ў краінах, якія не ўжываюць да Беларусі недружалюбныя меры. Указаны рэгламент дзейнічае да канца 2027 года“, — падкрэсліў Мінфін.
Паводле даных Нацыянальнага статыстычнага камітэта, цэны на алкагольныя напоі ў сакавіку 2026 года да папярэдняга месяца павялічыліся на 1,17% (з пачатку года — на 2,89%, у гадавым вымярэнні — на 6,08%). Алкаголь, аднесены да катэгорыі “напоі спіртныя і лікёры“, падаражэў на 1,39% (на 3,43% і 6,96% адпаведна), да катэгорыі “віно“ — на 0,29% (на 1,02% і 5,19%).
Міністэрства антыманапольнага рэгулявання і гандлю ў пачатку года паведамляла, што ў 2026 годзе права на пастаўку алкагольных напояў у Беларусь атрымалі 48 кампаній. Пералік імпарцёраў зацвярджаецца Лукашэнкам.
