Рассельгаснагляд не ўпусціў чарговую партыю беларускай ялавічыны

4 траўня, Позірк. Федэральная служба ветэрынарнага і фітасанітарнага нагляду (Рассельгаснагляд) не ўпусціла на тэрыторыю РФ чарговую партыю беларускай ялавічыны.

Як паведамляе ведамства, груз вагой каля 1,5 тоны перавозіўся 30 красавіка ў аўтамабілі з беларускімі рэгістрацыйнымі нумарамі.

“На прадукцыю жывёлагадоўлі адсутнічалі ветэрынарныя і таварна-суправаджальныя дакументы, клеймы ветэрынарна-санітарнай экспертызы на мясе не прастаўленыя“, — гаворыцца ў паведамленні.

Пры гэтым перавозчык “не даў інспектарам нагляднага ведамства інфармацыі аб адпраўніку і атрымальніку грузу”.

Перавозчык прыцягнуты да адміністрацыйнай адказнасці паводле ч. 2 арт. 10.8 КаАП РФ (парушэнне ветэрынарна-санітарных правілаў перавозкі, перагону або забою жывёл альбо правілаў нарыхтоўкі, перапрацоўкі, захоўвання або рэалізацыі прадуктаў жывёлагадоўлі).

“У сувязі з тым, што мяса прызнана прадуктам невядомага паходжання, перамяшчалася ў прыстасаваным транспарце з парушэннем устаноўленых санітарных нормаў, яно падвергнута дэнатурацыі хімічнымі рэагентамі і 4 траўня 2026 года вернута на сумежную тэрыторыю”, — гаворыцца ў прэс-рэлізе Рассельгаснагляду.

27 красавіка ў Смаленскай вобласці РФ была затрыманая беларуская машына з тонай ялавічыны, якую завезлі міма пунктаў кантролю.