Кіраўніком Мінпрыроды прызначаны Лысенка, папярэдні міністр Масляк знаходзіцца пад вартай па абвінавачванні ў хабарніцтве (падрабязна)
11 чэрвеня, Позірк. Міністрам прыродных рэсурсаў і аховы навакольнага асяроддзя 11 чэрвеня прызначаны Максім Лысенка, паведамляе прэс-служба Аляксандра Лукашэнкі.
Лысенка нарадзіўся ў 1984 годзе. У 2007-м скончыў Беларускі дзяржаўны тэхналагічны ўніверсітэт, 2010-м — Мінскі інстытут кіравання, 2025-м — Акадэмію кіравання пры Лукашэнку. З 1 ліпеня 2025-га працаваў першым намеснікам кіраўніка Мінпрыроды.
Папярэдні кіраўнік Мінпрыроды Сяргей Масляк знаходзіцца пад вартай па абвінавачванні ў хабарніцтве. Пра яго затрыманне Лукашэнка паведаміў у сакавіку гэтага года.
“Я не магу сказаць, што мяне задавальняе праца вашага міністэрства, — сказаў Лукашэнка пры прызначэнні Лысенкі. — Абсалютна не. Павінен быць на зямлі парадак. Гэта перш за ўсё. У прыродзе павінен быць парадак. Я ваша міністэрства не вельмі заўважаю, толькі ад выпадку да выпадку, шчыра прызнаюся. Майце на ўвазе, адказнасць будзе вельмі сур’ёзная. Найважнейшае міністэрства”.
Ён таксама прызначыў Вольгу Ануфрыеву на пасаду дырэктара — галоўнага рэдактара выдавецкага дома “Беларусь сёння” (папярэдні кіраўнік Дзмітрый Жук раней узначаліў Міністэрства інфармацыі). Ануфрыева раней узначальвала выдавецкі дом“Звязда”.
11 чэрвеня Лукашэнка прыняў шэраг іншых кадравых рашэнняў. Яўгена Сабалеўскага ён прызначыў амбасадарам у Лівіі па сумяшчальніцтве, Аляксандра Агароднікава — амбасадарам у Афганістане па сумяшчальніцтве, Аляксандра Іваніцкага — начальнікам Дэпартамента па ядзернай і радыяцыйнай бяспецы МНС.
Акрамя таго, Лукашэнка ўзгадніў прызначэнні: Яўгена Шкробата — старшынёй Петрыкаўскага райвыканкама (Гомельская вобласць), Андрэя Клышэўскага — старшынёй Ашмянскага райвыканкама (Гродзенская вобласць).
Таксама згоду на новыя пасады атрымалі: Міхаіл Сымановіч — генеральным дырэктарам ААТ “Кіруючая кампанія холдынгу “Белкамунмаш”, Эдуард Шаль — генеральным дырэктарам ААТ “Кіруючая кампанія холдынгу “Лідсельмаш”.
Лукашэнка ўзгадніў Віктара Шчацько на пасаду першага намесніка міністра прамысловасці, Аляксандра Постнікава — намесніка міністра транспарту і камунікацый, Генадзя Аксціловіча — начальніка галоўнага ўпраўлення па працы са зваротамі грамадзян і юрыдычных асоб Адміністрацыі прэзідэнта, Юрыя Хамутоўскага — начальніка ўпраўлення рэгіянальнай палітыкі АП, Алега Садоўскага — старшыні Камітэта дзяржкантролю Гомельскай вобласці, Аляксея Іглікава — членам Гродзенскага аблвыканкама, Надзею Юрашэвіч — намесніка начальніка арганізацыйна-аналітычнага дэпартамента пастаяннага камітэта Саюзнай дзяржавы (ПК СД), Вольгу Васілеўскую — намесніка начальніка дэпартамента сацыяльнай палітыкі і інфармацыйнага забеспячэння ПК СД.
