У Слонімскім раёне загінуў 29-гадовы матацыкліст
11 чэрвеня, Позірк. Аб смяротным дарожна-транспартным здарэнні ў Слонімскім раёне паведаміла УУС Гродзенскага аблвыканкама.
Трагедыя адбылася ў ноч на 11 чэрвеня: “Каля 01:30 29-гадовы кіроўца, кіруючы матацыклам “Мінск”, рухаўся па аўтадарозе М-11 мяжа Літоўскай Рэспублікі — Ліда — Слонім — Быцень. На 156-м кіламетры няправільна абраў хуткасць руху, не ўлічыў умовы надвор’я і на закругленні дарогі з’ехаў на левую абочыну, дзе здзейсніў падзенне”.
У выніку ДТЗ матацыкліст загінуў на месцы, яго 24-гадовы пасажыр дастаўлены ў бальніцу.
9 чэрвеня ў Салігорску (Мінская вобласць) пры сутыкненні з аўтамабілем загінуў 36-гадовы матацыкліст.
Пра гібель 44-гадовага кіроўцы матацыкла пад Гроднам паведамлялася 7 чэрвеня. Яго 17-гадовая дачка была дастаўлена ў бальніцу.
Колькасць дарожна-транспартных здарэнняў знізілася ў Беларусі за год на 5,5% (з 3.453 у 2024-м да 3.262 у 2025-м), вынікае з праведзенага “Позіркам” аналізу звестак Нацыянальнага статыстычнага камітэта. Колькасць загінулых у ДТЗ скарацілася на 1,8% (з 434 да 426), траўміраваных — на 8,4% (з 3.804 да 3.483).
