4 траўня, Позірк. За вырошчванне канопляў затрыманы 33-гадовы жыхар Гомеля, паведамляе УУС Гомельскага аблвыканкама.
Пры аглядзе яго кватэры выяўлена “памяшканне для вырошчвання нарказмяшчальных раслін”, гаворыцца ў паведамленні. У мужчыны канфіскаваныя кусты канопляў, марыхуана, а таксама “прыстасаванні для курэння, ўгнаенні, палімерныя пакеты з грунтам, сістэма асвятлення, вентылятары і ёмістасці”.
Затрыманы растлумачыў, што вырошчваў каноплі “для ўласнага спажывання”, адзначае УУС.
Распачатая крымінальная справа за “незаконны абарот наркотыкаў”.
“Наркаагронаму пагражае да трох гадоў пазбаўлення волі. Раней ён ужо прыцягваўся да адказнасці за аналагічнае злачынства”, — заявілі ў абласным упраўленні ўнутраных спраў.
10 красавіка паведамлялася, што супрацоўнікі наркакантролю Фрунзенскага РУУС Мінска затрымалі траіх жыхароў раёна, якія ў сваіх кватэрах “арганізавалі памяшканне для вырошчвання нарказмяшчальных раслін”.
Удакладнялася, што канфіскавана сем грамаў марыхуаны, гаршчок з каноплямі, прыстасаванні для ўжывання наркотыку.
Гл. таксама:
Супраць 39-гадовага мінчука распачатая крымінальная справа за вырошчванне ў кватэры марыхуаны
У жыхара Гродзенскай вобласці канфіскавана больш за 5 кг марыхуаны
У 68-гадовай жыхаркі Баранавічаў канфіскавана амаль 4 кг марыхуаны — прад’яўлена абвінавачванне
Наркакантроль затрымаў дваіх мужчын, якія вырошчвалі каноплі ў лесе на тэрыторыі Гродзенскага раёна
