Лукашэнка змяніў намесніка міністра МНС і прызначыў пастаяннага прадстаўніка Беларусі пры АДКБ

4 траўня, Позірк. Аляксандр Лукашэнка прызначыў намеснікам міністра па надзвычайных сітуацыях палкоўніка ўнутранай службы Дзмітрыя Голубева.

Адпаведны ўказ, як паведамляе прэс-служба Лукашэнкі, ён падпісаў 4 траўня.

Гэтым жа дакументам ад пасады намесніка кіраўніка МНС вызвалены генерал-маёр Ігар Болатаў. Адзначаецца, што ён “звольнены са службы ў органах і падраздзяленнях па надзвычайных сітуацыях у запас па ўзросце з правам нашэння ўстаноўленай формы адзення і знакаў адрознення”.

Раней Голубеў узначальваў Магілёўскае абласное ўпраўленне МНС.

Таксама 4 траўня Лукашэнка падпісаў указ аб прызначэнні старэйшага дарадцы амбасады Беларусі ў РФ Уладзіміра Бяспалава пастаянным і паўнамоцным прадстаўніком краіны пры Арганізацыі Дагавора аб калектыўнай бяспецы (АДКБ). Гэтую пасаду, згодна з дакументам, пакінуў Аляксандр Грыневіч.

Грыневіч быў пастаянным прадстаўніком Беларусі пры АДКБ з лютага 2022 года.

У АДКБ уваходзяць Арменія, Беларусь, Казахстан, Кыргызстан, Расія і Таджыкістан. Армянскія ўлады замарозілі ўдзел краіны ў арганізацыі і заявілі аб магчымым выхадзе з блока. Ерэван абвінаваціў арганізацыю ў бяздзейнасці падчас карабахскага канфлікту з Азербайджанам, а асобных членаў — у тым, што яны “планавалі вайну“ супраць Арменіі разам з Баку.