Памежнікі Латвіі выцягнулі з Даўгавы плыт з кантрабандай з Беларусі — другі раз за апошні тыдзень

18 красавіка, Позірк. Плыт з беларускімі кантрабанднымі цыгарэтамі, што плыў па Даўгаве, быў знойдзены 16 красавіка ў Краслаўскім краі Латвіі — у Піедруйскай воласці, якая мяжуе з Верхнядзвінскім, Мёрскім і Браслаўскім раёнамі Віцебскай вобласці (з апошнімі дзвюма мяжа праходзіць па згаданай рацэ, якая ў Беларусі называецца Заходзяй Дзвіной).

Супрацоўнікі латвійскай Дзяржаўнай памежнай аховы, як паведамляе прэс-служба ведамства, заўважылі падазроны прадмет, калі абследавалі раку ўздоўж мяжы на маторнай лодцы. Памежнікі вынялі плыт, зроблены з дзвюх камер трактарных шын, і праверылі груз — абгорнутыя поліэтыленавай плёнкай скруткі. У іх выявілася 62.060 цыгарэт (3.103 пачкі) NZ Gold Superslim з беларускімі акцызнымі маркамі.

Знаходку перадалі паліцыі. Распачатая справа ў рамках XIX главы Крымінальнага закона (“Злачынствы супраць нацыянальнай эканомікі”).

Гэта другі такі выпадак за апошні тыдзень. 10 красавіка памежнікі выцягнулі з Даўгавы выраблены такім жа чынам плыт, які транспартаваў 66.120 цыгарэт (3.306 пачкаў) NZ Gold з беларускімі акцызнымі маркамі.