Замежная студэнтка беларускай ВНУ спрабавала выехаць у Польшчу з дапамогай чужога пашпарта

18 лістапада, Позірк. Замежная студэнтка беларускай ВНУ затрыманая пры спробе выехаць у Еўрасаюз з дапамогай чужога пашпарта, вынікае з паведамлення Дзяржаўнага пагранічнага камітэта.

Паводле інфармацыі ведамства, інцыдэнт адбыўся ўвечары 16 лістапада ў пункце пропуску Брэст (з польскага боку — Цярэспаль).

Дзяўчына прад’явіла пашпарт грамадзяніна Бельгіі, які “выклікаў падазрэнне ў пагранічніка”. Праверка паказала, што дакумент належыць не ёй.

“Парушальнікам выявілася грамадзянка Рэспублікі Бурундзі, якая навучаецца ў адной з беларускіх ВНУ, — гаворыцца ў паведамленні. — Паводле яе слоў, яна не магла трапіць у Еўрасаюз з дапамогай свайго пашпарта праз адсутнасць візы. У сувязі з гэтым дзяўчына пазычыла дакумент для перасячэння мяжы ў сястры і паспрабавала выехаць у Польшчу”.

У дачыненні да замежніцы распачаты адміністрацыйны працэс “за спробу незаконнага перасячэння мяжы”. “Акрамя буйнога штрафу да 100 базавых велічынь (4.200 рублёў. — “Позірк”.), парушальніку пагражае яшчэ і крымінальная адказнасць за выкарыстанне заведама падложнага дакумента”, — заявіў Дзяржпагранкамітэт.

Раней ведамства паведамляла, што з чэрвеня да пачатку верасня 2025 года пагранічнікі затрымалі сем чалавек з падробленымі пашпартамі. Акрамя таго, было зафіксавана яшчэ больш за сотню выпадкаў, калі асобы, што перасякаюць мяжу, прад’яўлялі дакументы, якія сталі несапраўднымі.

Напрыклад, было 65 выпадкаў падачы пратэрмінаваных дакументаў, у тым ліку не абноўленых пасля змены прозвішча. 43 асобы падалі пашпарты з пашкоджаным фатаздымкам або размытай пячаткай органа, які выдаў дакумент. Перасячы мяжу з пашкоджанымі пашпартамі — з вырванымі старонкамі або ў трухлявым стане — спрабавалі 6 грамадзян.

Яшчэ 14 чалавек прыбылі ў пункты пропуску без дакументаў, неабходных для перасячэння мяжы.