З чэрвеня беларускія пагранічнікі затрымалі сем чалавек з падробленымі пашпартамі — Дзяржпагранкамітэт

2 верасня, Позірк. З чэрвеня беларускія пагранічнікі затрымалі сем чалавек з падробленымі пашпартамі, паведаміла 2 верасня прэс-служба Дзяржаўнага пагранічнага камітэта.

Акрамя таго, зафіксавана яшчэ больш за сотню выпадкаў, калі асобы, якія перасякалі мяжу, прад’яўлялі дакументы, што сталі несапраўднымі.

Напрыклад, было 65 выпадкаў падачы пратэрмінаваных дакументаў, у тым ліку не абноўленых пасля змены прозвішча. 43 асобы падалі пашпарты з пашкоджаным фатаздымкам або размытай пячаткай органа, які выдаў дакумент. Перасячы мяжу з пашкоджанымі пашпартамі — з вырванымі старонкамі або ў трухлявым стане — спрабавалі 6 грамадзян.

Яшчэ 14 чалавек прыбылі ў пункты пропуску без дакументаў, неабходных для перасячэння мяжы.

Раней Дзяржпагранкамітэт паведамляў, што 8 жніўня грамадзянін Расіі спрабаваў вылецець з мінскага аэрапорта ў ААЭ на падставе пашпарта для замежных паездак, у якім была замененая старонка з персанальнымі звесткамі.

15 ліпеня ў нацыянальным аэрапорце Мінск пры афармленні рэйса ў Стамбул быў затрыманы мужчына, які прад’явіў “пашпарт грамадзяніна РФ з прыкметамі поўнай падробкі”. Усе старонкі дакумента “былі надрукаваныя на звычайным прынтары”.