26 сакавіка, Позірк. Палітвязню, журналісту, актывісту ліквідаванага ўладамі Саюза палякаў Анджэю Пачобуту на паўгода працягнулі рэжым утрымання ў памяшканні камернага тыпу, паведамляе тэлеграм-канал “Право имеют“.
“Ён не можа выходзіць на свежае паветра і працаваць”, — адзначаюць аўтары канала, дадаючы, што вязень “ведае пра акцыі салідарнасці, якія праходзяць кожны месяц, і ўдзячны за іх”.
21 лютага Міжнародная праваабарончая арганізацыя PEN International запатрабавала неадкладна вызваліць Пачобута.
16 студзеня падчас наведвання Мінскага гарадскога тэхнапарку Аляксандр Лукашэнка заявіў, што Варшава “адмовілася ад Пачобута”, “адмовіліся весці нават размовы па Пачобуту”. Ён сцвярджаў, што журналіст “не хоча туды ехаць — вось і ўсё пытанне”.
Пасля вынясення палітычна матываванага прыгавору Пачобуту (8 гадоў пазбаўлення волі) 10 лютага 2023 года Польшча на нявызначаны тэрмін закрыла адзін з двух даступных для падарожнікаў пунктаў пропуску — Баброўнікі (Бераставіца). Паводле неафіцыйнай інфармацыі, журналіст адмовіўся пісаць прашэнне аб памілаванні.
30 кастрычніка 2024 года міністр замежных спраў Польшчы Радаслаў Сікорскі падчас выступу ў Сенаце заявіў, што Варшава “па розных каналах” дамагаецца вызвалення суайчыннікаў, якія знаходзяцца ў беларускіх турмах, асаблівая ўвага надаецца Пачобуту, “прыгаворанаму па фіктыўнай справе да васьмі гадоў калоніі”.
29 жніўня Сікорскі паведаміў, што для вызвалення журналіста Польшча “спрабуе розныя ідэі”. Чыноўнік выказаў надзею, што “адна з іх нарэшце спрацуе”.
Прэзідэнт Польшчы Анджэй Дуда 24 жніўня 2023 года заявіў, што Варшава працягвае працу па вызваленні Пачобута.
Аўтарызавацца
Забыліся пароль?
Выхад з профілю
