У Слуцкім раёне праходзіць збор з ваеннаабавязанымі тэрытарыяльных войскаў

20 жніўня, Позірк. Аб правядзенні ў Слуцкім раёне Мінскай вобласці навучальнага збору з ваеннаабавязанымі тэрытарыяльных войскаў паведаміла Міністэрства абароны.

Мерапрыемствы пад кіраўніцтвам кіраўніка райвыканкама Уладзіміра Гогі пройдуць з 20 жніўня па 13 верасня.

У ходзе збору плануецца “павысіць навыкі службовых асоб <…> у фарміраванні воінскіх часцей тэрытарыяльных войскаў, а ваеннаабавязаных — у выкананні задач па прызначэнні”.

У рамках вучэнняў пройдзе “прыём ваеннаабавязаных тэрытарыяльных войскаў і іх усебаковае забеспячэнне з выкарыстаннем рэсурсаў мясцовай базы мабілізацыйнага разгортвання”.

Таксама камандны склад “адновіць навыкі кіравання падпарадкаванымі, а ваеннаабавязаныя падрыхтуюцца да выканання задач у адпаведнасці з ваенна-ўліковымі спецыяльнасцямі і службовым прызначэннем”.

З 1 па 23 жніўня пад кіраўніцтвам кіраўніка адміністрацыі Маскоўскага раёна Мінска Таццяны Калядка праходзіць навучальны збор з ваеннаабавязанымі тэрытарыяльных войскаў раёна.

Тэрытарыяльныя войскі — род войскаў Узброеных сіл, які склікаецца ў перыяд вайны або напружанай ваенна-палітычнай абстаноўкі. Выконвае дапаможныя функцыі. Складаецца з асоб, якія прайшлі службу і знаходзяцца ў запасе.

Разам з тым міністр абароны Віктар Хрэнін на сустрэчы з кіраўніцтвам выканкамаў — Мінскага гарадскога і абласных, а таксама ваеннымі камісарамі са сталіцы і рэгіёнаў 26 мая 2023 года ў Гомелі заявіў, што тэрытарыяльная абарона “з сістэмы, якая забяспечвае, трансфармуецца ў паўнавартасную баявую”.

24 лютага 2022 года Расія пры падтрымцы Беларусі пачала поўнамаштабную вайну супраць Украіны. Мінск на працягу гэтага часу практычна пастаянна праводзіць якія-небудзь вучэнні з удзелам вайскоўцаў і сілавікоў.