Ціханоўская заклікала безумоўна вызваліць больш за 200 палітвязняў у крытычным стане
3 ліпеня, Позірк. У Беларусі больш за 200 палітвязняў знаходзіцца ў крытычным стане, адзначыла дэмакратычны лідар Святлана Ціханоўская.
“Яны мусяць быць вызваленыя безумоўна. Іх неадкладнае вызваленне — не палітычнае, а гуманітарнае пытанне”, — напісала палітык на сваёй старонцы ў сацыяльнай сетцы Х.
Падкрэсліўшы, што жыццё згаданых вязняў знаходзіцца пад пагрозай, яна нагадала, што ў зняволенні ўжо памерла сама меней шэсць чалавек.
Заклік Ціханоўскай з’явіўся на фоне анансаванага Аляксандрам Лукашэнкам вызвалення цяжкахворых апанентаў улады.
“Мы людзі і павінны дзейнічаць па-людску, — заявіў Лукашэнка 2 ліпеня на ўрачыстым сходзе да Дня незалежнасці. — Не дзіўцеся, калі праз некалькі дзён на волю выйдуць вельмі цяжкахворыя (як пра іх пішуць) нашы, якія не паспелі збегчы і знаходзяцца ў месцах не такіх далёкіх, якія ламалі, крышылі краіну ў 2020 годзе. Гэта сапраўды цяжка хворыя, у асноўным з ракавымі захворваннямі”.
На слуханнях Камісіі ЗША па бяспецы і супрацоўніцтве ў Еўропе (Хельсінкская камісія) 13 чэрвеня Ціханоўская паведаміла пра падрыхтаваны дэмакратычнымі сіламі “гуманітарны спіс” палітвязняў, якія мусяць быць неадкладна вызваленыя. У яго ўвайшло 16 чалавек з абмежаванымі магчымасцямі, 91 — з цяжкімі захворваннямі, 65 пенсіянераў, 10 чалавек з псіхічнымі разладамі, 23 непаўналетнія, а таксама не менш як пяць сем’яў, у якіх абодва бацькі знаходзяцца ў месцах пазбаўлення волі.
На 3 ліпеня ў Беларусі 1.409 чалавек, якіх праваабаронцы прызнаюць палітвязнямі. У рэальнасці грамадзян, якія зазналі рэпрэсіі ў той ці іншай форме, значна больш.
