Лукашэнка пра нелегальных мігрантаў: Мы не адстойнік, мы нікога тут лавіць не будзем

27 кастрычніка, Позірк. “Мы не адстойнік, мы нікога тут лавіць не будзем”, — заявіў Аляксандр Лукашэнка 27 кастрычніка падчас паездкі ў Мінскі раён, каментуючы патокі нелегальнай міграцыі з Беларусі ў краіны Еўрасаюза.

“Тым больш вы (краіны Захаду. – “Позірк”.) іх паклікалі. Няхай ідуць”, — цытуе Лукашэнку яго прэс-служба.

Пры гэтым ён назваў недапушчальнымі “дзеянні еўрапейскіх суседзяў, якія забіваюць уцекачоў і перакідваюць іх на беларускую тэрыторыю або закопваюць ля сваёй мяжы”.

“Мы ім (суседнім краінам ЕС. – “Позірк”.) верылі. А калі не верылі, ішлі заўсёды насустрач, працягвалі руку. А яны ў нас кідалі камяні. Але мы гатовыя перасягнуць праз гэта. Трэба глядзець наперад. Праз гэта трэба ўмець пераступіць і ісці наперад, дамаўляцца. Мы да гэтага гатовыя”, — заявіў Лукашэнка.

Паводле яго сцвярджэння, у Беларусь з сумежных краін ЕС “не толькі кожны дзень, а па некалькі разоў на дзень падкідваюць і трупы, і паламаных, і пераламаных”.

Лукашэнка заявіў, што раней Беларусь дапамагала ЕС абараняць яго знешнія рубяжы, бакі рэалізоўвалі сумесныя праекты па міграцыі. Аднак калі “Еўрасаюз увёў санкцыі і пачаў эканамічную вайну супраць Беларусі”, ён папярэдзіў, што Мінск больш не стане дапамагаць ЕС у барацьбе з нелегальнай міграцыяй.

За папярэдні дзень, 26 кастрычніка, краіны ЕС не дазволілі нелегальна трапіць 234 мігрантам з тэрыторыі Беларусі (суткамі раней — 149).

У 2023 годзе спынена 37.837 спробаў незаконнага пранікнення ў ЕС з беларускай тэрыторыі (у Польшчу — 23.138, Латвію — 12.514, Літву — 2.185), ад пачатку кастрычніка — 4.613.

Латвія закрыла пункт пропуску Сілене (з сумежнага боку — Урбаны) 19 верасня з прычыны наплыву нелегальных мігрантаў з Беларусі.

28 жніўня міністры ўнутраных спраў Польшчы і краін Балтыі вызначылі масавы прарыў нелегальных мігрантаў адной з падстаў для поўнага закрыцця мяжы ЕС з Беларуссю. Міграцыйны крызіс на мяжы Беларусі і краін ЕС пачаўся ўвесну 2021 года.