Латвійскія чыгуначнікі заклікаюць не адмаўляцца ад паставак беларускіх запчастак
6 траўня, Позірк. Латвійская кампанія AS Pasažieru vilciens (PV) (“Пасажырскі цягнік”. — “Позірк”.) заклікае зрабіць выключэнне ў законапраекце аб забароне закупак тавараў і паслуг расійскага і беларускага паходжання, паведамляе Tvnet.
Аргументавана гэта тым, што старыя электра- і дызельныя цягнікі, якія выкарыстоўваюцца прадпрыемствам, былі зроблены ў савецкі час, і большую частку неабходных для іх запчастак немагчыма замяніць выпускаемымі цяпер у Еўрасаюзе.
Як падкрэслівае прадпрыемства, для гарантавання бяспекі эксплуатацыі транспартных сродкаў унесці якія-небудзь змены ў канструкцыю вагонаў немагчыма.
Па дадзеных кампаніі, PV шукае альтэрнатыўныя рашэнні.
“Калі не будзе разумнага выключэння, PV зможа эксплуатаваць рухомыя саставы толькі да таго часу, пакуль у распараджэнні кампаніі існуе запас запчастак, што ў шэрагу выпадкаў будзе зрасходавана ўжо вясной гэтага года. Такім чынам, PV будзе вымушана скараціць колькасць рухомых саставаў”, — цытуе СМІ ліст кампаніі, які яна накіравала ў бюджэтна-фінансавую камісію Сейма Латвіі.
Узгаданая камісія цяпер разглядае папраўкі да закона аб закупках прадпрыемстваў – пастаўшчыкоў грамадскіх паслуг, згодна з якімі прэтэндэнты павінны гарантаваць, што не будуць пастаўляцца расійскія і беларускія тавары і паслугі.
Аб тым, што ў Латвіі могуць прыняць законапраект аб забароне тавараў і паслуг з Беларусі і Расіі пры ажыццяўленні дзяржзакупак паведаміў 18 красавіка аб’яднаны партал навін Латвійскага радыё і тэлебачання.
Папраўкі складаюцца з аднаго артыкула. У ёй гаворыцца, што заказчык, рыхтуючы закупку, “выстаўляе патрабаванне да прэтэндэнтаў забяспечыць, каб пры выкананні заказу не выкарыстоўваліся тавары і паслугі з Расіі і Беларусі”. Прадугледжваецца, што абмежаванне набудзе моц 1 студзеня 2025 года.
Законапраект прапанаваны дэпутатамі ад партыі Нацыянальнае аб’яднанне, якія раней выступалі за забарону руху па латвійскіх дарогах аўтамабіляў з беларускімі нумарамі.
Раней LSM анансаваў увядзенне з 8 сакавіка забароны на ўвоз у краіну гародніны, садавіны і некаторай іншай сельскагаспадарчай прадукцыі з Расіі і Беларусі. Мера была ўведзена ў дзеянне.
