У Латвіі могуць забараніць куплю тавараў з Беларусі і РФ па дзяржзаказе

18 красавіка, Позірк. Законапраект аб забароне тавараў і паслуг з Беларусі і Расіі пры ажыццяўленні дзяржзакупак магу прыняць у Латвіі, паведаміў аб’яднаны партал навінаў Латвійскага радыё і тэлебачання (LSM).

Адзначаецца, што папраўкі да законаў аб публічных закупках і аб закупках пастаўшчыкоў грамадскіх паслуг Сейм перадаў сваёй бюджэтна-фінансавай камісіі.

Папраўкі складаюцца з аднаго артыкула. У ім гаворыцца, што заказчык, рыхтуючы закупку, “высоўвае патрабаванне да прэтэндэнтаў забяспечыць, каб пры выкананні замовы не выкарыстоўваліся тавары і паслугі з Расіі і Беларусі”. Мяркуецца, што абмежаванне набудзе моц 1 студзеня 2025 года.

Законапраект прапанаваны дэпутатамі ад партыі Нацыянальнае аб’яднанне, якія раней выступалі за забарону руху па латвійскіх дарогах аўтамабіляў з беларускімі нумарамі.

Раней LSM анансаваў увядзенне з 8 сакавіка забароны на ўвоз у краіну гародніны, садавіны і некаторай іншай сельскагаспадарчай прадукцыі з Расіі і Беларусі. Мера была ўведзена ў дзеянне.

Гл. таксама:

Прэм’ер Латвіі заявіла аб падрыхтоўцы новых санкцый ЕС у дачыненні да Беларусі