МЗС Вялікабрытаніі: Падданым з беларускім пашпартам улады на радзіме могуць адмовіць у консульскай дапамозе ў выпадку арышту
11 красавіка, Позірк. Міністэрства замежных спраў, па справах Садружнасці і развіцця (FCDO) Вялікабрытаніі 10 красавіка ўнесла папраўку ў паведамленне, якое папярэджвае падданых, што маюць таксама беларускае грамадзянства, аб небяспецы падарожжа ў Беларусь.
Змены закранулі падпункт “Падвойнае грамадзянства” раздзела “Папярэджанні і страхаванне”. FCDO захавала папярэджанне, што Беларусь не прызнае падвойнае грамадзянства, і дадало, што пры арышце суайчыннікам на радзіме можа быць абмежаваны доступ да консульскай дапамогі FCDO з боку мясцовых уладаў.
У папярэдняй рэдакцыі проста нагадвалася, што пры наяўнасці брытанскага і беларускага пашпартоў улады Беларусі будуць лічыць іх уладальніка беларусам, нават калі ён заедзе ў краіну па брытанскім пашпарце.
“У Беларусі праходзяць расійскія вайсковыя аперацыі. Існуе некаторая рызыка таго, што прамы канфлікт, звязаны з вайной ва Украіне, можа распаўсюдзіцца на Беларусь, — нагадвае МЗС Вялікабрытаніі. — Калі пачнецца канфлікт, магчымасці FCDO па аказанні консульскай дапамогі будуць сур’ёзна абмежаваныя. Маршруты з краіны абмежаваныя, асабліва па паветры”.
Упершыню знешнепалітычнае ведамства гэтай краіны рэкамендавала суайчыннікам устрымацца ад паездак у Беларусь 18 лютага 2022 года.
Паведамленне было праілюстраванае картай з пазначэннем месцаў, якія не варта наведваць ні пры якіх абставінах у сувязі з расійска-беларускімі вучэннямі “Саюзная рашучасць — 2022”, якія сталі падставай для канцэнтрацыі войска РФ ля мяжы з Украінай для яго наступнага поўнамаштабнага ўварвання з тэрыторыі Беларусі.
“Са студзеня 2022 года павелічэнне колькасці расійскіх войскаў ля межаў Украіны, у тым ліку на тэрыторыі Беларусі, узмацніла пагрозу ваенных дзеянняў. У выпадку ваенных дзеянняў нашы магчымасці па аказанні консульскай дапамогі будуць абмежаваныя”, — гаварылася ў паведамленні знешнепалітычнага ведамства.
На думку Лондана, сітуацыя непрадказальная і можа абвастрыцца без папярэджання. Брытанскім падданым рэкамендавалася пазбягаць зон абмежаванага доступу, адведзеных для ваенных вучэнняў або аперацый, не фатаграфаваць ваенныя дзеянні і аб’екты стратэгічнага прызначэння. Адзначалася, што месцы забаронаў могуць не пазначацца адпаведнымі знакамі.
“Сітуацыя ў Мінску і іншых буйных гарадах спакойная, але гэта можа хутка змяніцца”, — папярэджвала суайчыннікаў МЗС Вялікабрытаніі.
23 студзеня 2022 года з рэкамендацыяй не наведваць Беларусь упершыню выступіў Дзярждэпартамент ЗША, паўтарыўшы папярэджанне 12 красавіка і 23 жніўня 2023 года.
21 лютага 2022 года аб небяспецы наведвання Беларусі папярэдзіла знешнепалітычнае ведамства Канады, якое заклікала пазбягаць “неістотных паездак” у Беларусь.
13 лютага 2023 года пасольства Францыі пацвердзіла, што з канца лютага 2022 года МЗС гэтай краіны афіцыйна не рэкамендуе сваім грамадзянам наведваць Беларусь і заклікае яе пакінуць з пачатку вайны РФ супраць Украіны.
