Ціханоўская і Кізім абмеркавалі “пачатак беларуска-ўкраінскага дыялогу”

24 лютага, Позірк. “Пачатак беларуска-ўкраінскага дыялогу і магчымую супрацу паміж дэмакратычнай Беларуссю і Украінай” абмеркавалі 23 лютага ў Вільнюсе Святлана Ціханоўская і амбасадар Украіны па асаблівых даручэннях па Беларусі Ігар Кізім.

“Ціханоўская павіншавала Ігара Кізіма з прызначэннем, падзякавала за працу ў Беларусі, выказала словы салідарнасці і падтрымкі Украіне”, — гаворыцца ў кароткім паведамленні прэс-службы беларускага дэмакратычнага лідара.

Былы амбасадар Украіны ў Беларусі (з 16 лютага 2017 года до 22 чэрвеня 2023 года) Кізім быў прызначаны амбасадарам па асаблівых даручэннях па Беларусі сёлета 3 лютага. Неўзабаве пасля гэтага ён сустрэўся з ваярамі палка Каліноўскага і спецпрадстаўніком Аб’яднанага пераходнага кабінета Генадзем Манько.

Цяпер Кізім наведвае Польшчу і Літву, дзе сустракаецца з лідарамі дэмакратычнай Беларусі і еўрапейскімі дыпламатамі, адказнымі за беларускі накірунак. У прыватнасці, адбыліся перамовы з кіраўніком Народнага антыкрызіснага ўпраўлення Паўлам Латушкам, галоўным дарадцам Ціханоўскай Франакам Вячоркам, дарадцам дэмлідара па парламенцкім супрацоўніцтве і канстытуцыйнай рэформе Анатолем Лябедзькам, спецпрадстаўнікамі па Беларусі Артурам Міхальскім (Польшча) і Астай Андрыяўскене (Літва).

Гл. таксама інтэрв’ю Ігара Кізіма “Позірку”:

Ігар Кізім: Для Украіны вельмі важна, што беларускія дэмсілы не падтрымліваюць вайну