Рада БНР: 25 жніўня 1991 года Беларусь дэ-юрэ стала незалежнай дзяржавай
25 жніўня, Позірк. Рада Беларускай Народнай Рэспублікі, як і Святлана Ціханоўская, назвала 25 жніўня 1991 года “Днём аднаўлення незалежнасці Беларусі” ды заклікала беларусаў захоўваць адзінства дзеля будучыні краіны.
Заява прымеркаваная да 35-годдзя надання Дэкларацыі аб дзяржаўным суверэнітэце БССР статусу канстытуцыйнага закона, пасля чаго, як лічыць Рада, “Беларусь дэ-юрэ зрабілася незалежнай дзяржавай”.
“Беларускі народ вярнуў сабе тое, за што змагаўся пакаленнямі, незалежнасць”, — гаворыцца ў дакуменце.
Рада БНР адзначыла, што прыняцце рашэння стала магчымым дзякуючы намаганням дэпутацкай апазіцыі БНФ, тысяч актывістаў і беларускіх патрыётаў, якія “ўсведамлялі неабходнасць скарыстаць гістарычны шанец”.
Паводле заявы, пасля прыходу да ўлады Аляксандра Лукашэнкі, які названы “стаўленнікам Масквы”, Беларусь больш за тры дзесяцігоддзі губляе суверэнітэт у палітычнай, эканамічнай і вайсковай сферах. Рада БНР таксама згадала пра знішчэнне нацыянальнай культуры, беларускай мовы, кнігадруку і гістарычнай памяці.
Асобна ў заяве згадваюцца рэпрэсіі, распачатыя пасля прэзідэнцкіх выбараў 2020 года, маштаб якіх Рада БНР назвала “сталінскім”. Структура лічыць, што рэжым Лукашэнкі, выціснуўшы сотні тысяч беларусаў у вымушаную эміграцыю, імкнецца “раз’яднаць беларусаў” і падзяліць нацыю на тых, хто знаходзіцца ў Беларусі, і тых, хто жыве за мяжой.
“Супрацьстаяць гэтаму можна толькі ўсведамляючы адзінства нашай мэты — захавання Беларусі як дзяржавы і зберажэння таго, што адрознівае беларускую нацыю ад іншых нацый: яе мовы, яе культуры, яе пакутнай, але адначасова і гераічнай гісторыі”, — заявіла Рада БНР.
25 жніўня 1991 года Вярхоўны Савет БССР надаў Дэкларацыі аб дзяржаўным суверэнітэце статус канстытуцыйнага закона. 19 верасня таго ж года БССР атрымала назву Рэспубліка Беларусь.
