Кіраўнікі МЗС краін Паўночнай Еўропы і Балтыі абмеркавалі міграцыйны крызіс і палітычную сітуацыю ў Беларусі

22 снежня. Міграцыйны крызіс і палітычная сітуацыя ў Беларусі абмеркаваныя на апошняй у гэтым годзе сустрэчы міністраў замежных спраў краін Паўночнай Еўропы і Балтыі (нефармальны фармат NB8 — Nordic-Baltic Eight).

“Рэжым Лукашэнкі застаецца варожым і непрадказальным. Мы павінны і ў далейшым надаваць асаблівую ўвагу выкарыстанню мігрантаў рэжымам, узмацненню рэпрэсій і становішчу з правамі чалавека ў Беларусі, якое пагаршаецца”, — заявіў кіраўнік знешнепалітычнага ведамства Літвы Габрыэлюс Ландсбергіс. Ён указаў таксама на ваенную інтэграцыю Расіі і Беларусі, якая паглыбляецца і “выклікае заклапочанасць”.

Паводле інфармацыі прэс-службы літоўскага МЗС, удзельнікі сустрэчы пагадзіліся з тым, што сучасныя выклікі, што стаяць перад краінамі рэгіёну і ўсяго свету, патрабуюць адзінага адказу, які магчымы толькі пры каардынацыі намаганняў.

“Мы будзем імкнуцца ўмацаваць пазіцыі нашага рэгіёну як сацыяльна ўстойлівага грамадства, лідара дэмакратыі і правоў чалавека”, — сказаў Ландсбергіс.

У NB8 уваходзяць Данія, Ісландыя, Латвія, Літва, Нарвегія, Фінляндыя, Швецыя і Эстонія. Фармат з’явіўся ў 1992 годзе.

У наступным годзе каардынаваць NB8 будзе Літва, якой перадасць паўнамоцтвы Фінляндыя.