ЗША ўвялі дадатковыя санкцыі супраць кіраўніка беларускай кампаніі Armory Alliance Талібава
5 лістапада, Позірк. Пра пашырэнне санкцыйных падстаў у дачыненні да грамадзяніна Беларусі Махамеда Алі Талібава, кіраўніка зарэгістраванай у Мінску кампаніі Armory Alliance, сведчыць абнаўленне санкцыйнага спіса Упраўлення па кантролі за замежнымі актывамі (OFAC) Міністэрства фінансаў ЗША ад 4 лістапада.
Да абмежаванняў, якія дзейнічалі раней, дададзеныя санкцыі паводле прэзідэнцкага ўказа № 13949, які тычыцца дзейнасці Ірана ў сферы звычайных узбраенняў.
Талібаў ужо знаходзіўся пад блакуючымі санкцыямі, уведзенымі на падставе ўказа № 13382, накіраванага супраць распаўсюднікаў зброі масавага знішчэння і асоб, якія іх падтрымліваюць. Такім чынам, цяперашняе рашэнне дапаўняе прававую аснову абмежаванняў у дачыненні да яго.
Як паведамляў “Позірк”, 8 траўня 2026 года ЗША ўвялі санкцыі супраць Armory Alliance, Талібава і супрацоўніка кампаніі, які знаходзіцца ў Беларусі, — грамадзяніна Ірана Махамадмахдзі Малекі.
Паводле версіі амерыканскага Мінфіна, Armory Alliance выступала пасрэднікам пры закупках узбраенняў для іранскага Цэнтра інавацый і тэхналагічнага супрацоўніцтва, спрабуючы схаваць канчатковага атрымальніка. Цэнтр, у прыватнасці, спрабаваў набыць у Кітаі пераносныя зенітныя ракетныя комплексы.
Талібаў быў уключаны ў санкцыйны спіс за дзеянні ад імя або ў інтарэсах Armory Alliance. Мінфін ЗША характарызаваў яго як даўняга пасрэдніка ў закупках узбраенняў для Ірана ў Беларусі.
ТАА “Арморы Альянс” зарэгістраванае ў кастрычніку 2021 года ў Мінску. Асноўным відам дзейнасці заяўлены аптовы гандаль іншымі машынамі і абсталяваннем.
