На біржавых таргах чацвёрты дзень запар даражэе толькі расійскі рубель
22 кастрычніка, Позірк. Амерыканская, агульная еўрапейская, а таксама кітайская валюты зноў патаннелі, а расійскі рубель — падаражэў на таргах Беларускай валютна-фондавай біржы 22 кастрычніка 2026 года.
Такая тэндэнцыя назіраецца ад пачатку тыдня, то бок чацвёрты дзень запар.
22 кастрычніка курс долара знізіўся да 2,9543 рубля (-0,57%; -0,017). На супастаўным узроўні ён таргаваўся 11 жніўня — тады амерыканская валюта патаннела з 2,9634 да 2,948.
Юань патаннеў да 4,4341 за 10 (-0,52%; -0,0233), еўра — да 3,3210 (-0,37%; -0,0125).
Каціроўка расійскага рубля вырасла да 3,6460 за 100 (+0,57%; +0,0206).
На мінулым працоўным тыдні (12–16 кастрычніка) курс долара знізіўся на 0,97% (з 3,0392 да 3,0098 рубля), юаня — на 1,03% (з 4,5531 да 4,5061 за 10), еўра — на 0,59% (з 3,4081 да 3,388); расійскі рубель падаражэў на 0,39% (з 3,5899 да 3,604 за 100).
Афіцыйны курс долара ў Беларусі за дзевяць месяцаў 2026 года вырас на 4,33% (з 2,9027 да 3,0285 рубля). Гэта чацвёрты паказчык на тэрыторыі былога СССР, сведчыць праведзены “Позіркам” параўнальны аналіз каціровак цэнтрабанкаў. Паводле вынікаў студзеня — жніўня Беларусь была трэцяй.
На першых пазіцыях Расія, дзе долар падаражэў на 7,93% (з 78,2267 да 84,4283 рубля), Украіна — 5,84% (з 42,3878 да 44,8624 грыўні) і Малдова — 5,75% (з 16,7925 да 17,7575 лея).
Менш вырасла каціроўка долара ў Латвіі, Літве, Эстоніі, якія ўваходзяць у еўразону, — на 3,48% (з 0,8511 да 0,8624 еўра), у Кыргызстане — на 0,04% (з 87,4177 да 87,4483 сома).
У верасні долар у Беларусі патаннеў на 0,37% — чацвёртае месца пасля Казахстана (-5,47%), Расіі (-1,37%) і Арменіі (-0,45%).
