Хрэнін: Баявыя магчымасці рэгіянальнай групоўкі Беларусі і РФ падвышаюцца за кошт узаемных паставак узбраенняў (дапоўнена)

дададзеныя абзацы 7–9

22 кастрычніка, Позірк. За кошт узаемных паставак вайсковай прадукцыі, кааперацыі беларускага і расійскага абаронна-прамысловых комплексаў “падвышаюцца баявыя магчымасці рэгіянальнай групоўкі войскаў (сіл) і Адзінай рэгіянальнай сістэмы супрацьпаветранай абароны”, заявіў міністр абароны Віктар Хрэнін 22 кастрычніка ў Мінску на пасяджэнні сумеснай калегіі міністэрстваў абароны Беларусі і РФ.

Паводле інфармацыі прэс-службы беларускага ваеннага ведамства, Мінск і Масква перайшлі да практычнай рэалізацыі праграмы стратэгічнага партнёрства ў вайсковай галіне на 2026–2030 гады, зацверджанай на папярэднім пасяджэнні калегіі ў Маскве. План двухбаковай ваеннай супрацы на 2026 год, як сказаў Хрэнін, уключае больш за 160 сумесных мерапрыемстваў, большасць з якіх — “практычная адпрацоўка задач”: вучэнні, трэніроўкі, зборы, абмен досведам.

Беларускі міністр адзначыў, што падрыхтоўка войскаў будуецца “з улікам сучаснага характару ўзброенай барацьбы”: “Досвед, атрыманы ў рэальных баявых умовах, — беспілотныя сістэмы, сродкі радыёэлектроннай барацьбы, рабатызаваныя комплексы, новыя тактычныя прыёмы — неадкладна ўкараняецца ў сістэму падрыхтоўкі беларускай арміі. Расійскія калегі дзеляцца з намі перадавымі напрацоўкамі, і гэта адзін з самых каштоўных бакоў нашага саюза”.

Паводле яго слоў, “развіццё атрымлівае” таксама “ядзернае стрымліванне на тэрыторыі Саюзнай дзяржавы — у інтарэсах стратэгічнага парытэту і стрымлівання патэнцыйнага агрэсара”.

Хрэнін падкрэсліў значнасць стратэгічнага партнёрства Беларусі і РФ у кантэксце ваенна-палітычнай абстаноўкі: “Абстаноўка вакол нашых дзяржаў застаецца складанай і дынамічнай”.

“Праводзіцца актыўная навучальна-баявая і выведніцкая дзейнасць паблізу нашых межаў, нарошчваецца вайсковая прысутнасць на ўсходнім флангу Паўночнаатлантычнага альянсу, працягваюцца спробы дэстабілізацыі і правакацый у інфармацыйнай прасторы, — сцвярджае ён. — У гэтых умовах наша сумесная праца — не фармальнасць, а практычная неабходнасць. Менавіта адзінства Беларусі і Расіі дазваляе стабільна ўтрымліваць сітуацыю ў рэгіёне пад кантролем”.

У сваю чаргу міністр абароны РФ Андрэй Белавусаў назваў Беларусь “найбліжэйшым саюзнікам і надзейным партнёрам” Расіі. Ён адзначыў, што краіны рэгулярна праводзяць “баявое зладжванне злучэнняў і вайсковых часцей, прызначаных у склад рэгіянальнай групоўкі войскаў (сіл)”. Пры гэтым, паводле яго слоў, прыярытэтная ўвага надаецца “сумесным практычным дзеянням з апорай на перадавы досвед СВА” (“спецыяльнай ваеннай аперацыяй” расійскія, а ўслед за імі і беларускія ўлады называюць поўнамаштабную вайну, якую РФ вядзе супраць Украіны).

“Працягваем рыхтаваць вайсковыя кадры ў адукацыйных арганізацыях Мінабароны Расіі. Цяпер у 24 вайсковых ВНУ паводле адзінага навучальнага плана і праграм навучаюцца 418 беларускіх вайскоўцаў, — заявіў Белавусаў. — Па найбольш запатрабаваных спецыяльнасцях арганізаванае навучанне на базе расійскага Міжвідавога цэнтра баявой падрыхтоўкі ў Муліне. У інтарэсах Узброеных Сіл Рэспублікі Беларусь у ім прайшлі навучанне 1.315 чалавек”.

“Працягваем надаваць падвышаную ўвагу супрацы ў вайскова-тэхнічнай сферы. Наладжваем кааперацыю абаронна-прамысловых комплексаў дзвюх краін. <…> Дасягнуты ўзровень усебаковай супрацы забяспечвае аператыўнае выкананне задач па нейтралізацыі ўсяго спектра сучасных выклікаў і пагроз бяспецы нашых краін”, — дадаў ён.

Як паведамлялася раней, на парадак дня пасяджэння сумеснай калегіі міністэрстваў абароны “вынесеныя пытанні, якія маюць прынцыповае значэнне для ўмацавання абараназдольнасці Саюзнай дзяржавы”.

Гаворка пра “функцыянаванне рэгіянальнай групоўкі войскаў (сіл) Беларусі і Расіі”, “удасканаленне аб’яднанай вайсковай інфраструктуры і адзінай сістэмы СПА”, “паглыбленне ўзаемадзеяння органаў вайсковага кіравання ў галіне сумеснай аператыўнай і баявой падрыхтоўкі”.

Падчас анлайн-брыфінгу праз WhatsApp 17 кастрычніка прэзідэнт Украіны Уладзімір Зяленскі заявіў, што Расія хоча размясціць у Беларусі балістычную зброю.

24 лютага 2022 года Расія пачала поўнамаштабную вайну супраць Украіны — найбуйнейшую ў Еўропе пасля Другой сусветнай. Рэжым Аляксандра Лукашэнкі надаў арміі РФ тэрыторыю для нападу на суседнюю краіну ўзімку і ўвесну 2022 года, а пасля на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў. Паводле даных журналістаў-расследавальнікаў, многія беларускія прадпрыемствы цяпер актыўна займаюцца вытворчасцю на карысць расійскага вайскова-прамысловага комплексу.