Ціханоўская абмеркавала з жанчынамі-амбасадарамі шасці краін у Польшчы падтрымку беларускіх палітвязняў і ініцыятыў

21 кастрычніка, Позірк. Пытанні вызвалення і падтрымкі беларускіх палітвязняў, дапамогі рэпрэсаваным, журналістам і праваабаронцам абмеркавала Святлана Ціханоўская 20 кастрычніка ў Варшаве на нефармальнай сустрэчы з жанчынамі-амбасадарамі шасці краін, паведамляе яе прэс-служба.

У сустрэчы ўзялі ўдзел амбасадары Вялікабрытаніі — Мелінда Сіманс, Канады — Эманюэль Лямуро, Фінляндыі — Майма Хенрыксан, Іспаніі — Вікторыя Артэга Гуцьерэс, Швецыі — Марціна Квік, а таксама амбасадар Люксембурга Пегі Франтцэн.

Сустрэчу арганізавала Сіманс, якая ў 2019–2023 гадах узначальвала брытанскую дыпламатычную місію ва Украіне. Мерапрыемства стала працягам дыялогу, распачатага падчас сустрэчы з жанчынамі-амбасадарамі сёлета ў чэрвені.

Асобную ўвагу ўдзельніцы надалі дзейнасці Міжнароднага гуманітарнага фонду падтрымкі палітзняволеных, праблемам беларусаў у выгнанні, у тым ліку атрыманню дакументаў, а таксама міжнароднаму супрацоўніцтву і падтрымцы беларускіх ініцыятыў.

Бакі абмеркавалі далейшую падтрымку беларускіх журналістаў, праваабаронцаў, рэпрэсаваных і палітвязняў.

Асобна дэмлідар распавяла пра Акадэмію жаночага палітычнага лідарства — адукацыйную праграму, якую рэалізуюць яе офіс і Офіс дэмакратычных сіл Беларусі ў Чэхіі.

Трэці этап праграмы быў арганізаваны 13–18 верасня 2026 года ў Празе пры падтрымцы фонду Rosa Luxemburg Stiftung. У навучанні ўзялі ўдзел 11 беларусак, якія пражываюць у Польшчы, Літве і Германіі. Конкурс склаў пяць чалавек на месца.

Праграма накіраваная на развіццё лідарскіх навыкаў жанчын, якія маюць палітычны або грамадскі досвед, і падрыхтоўку да больш актыўнага ўдзелу ў грамадска-палітычных працэсах.

Першы этап адбылася ў траўні 2025 года ў Варшаве, другі — у лістападзе ў Празе. Іх прайшлі адпаведна 15 і 10 удзельніц. Другая праграма была прызначаная для жанчын з досведам палітычнага зняволення.