Зернесушылка і экскаватар гарэлі ў Гродзенскай вобласці
30 верасня, Позірк. Пра чарговыя пажары на аб’ектах аграпрамысловага комплексу даводзіцца ў апошніх аператыўных зводках Міністэрства па надзвычайных сітуацыях.
Позна ўвечары 29 верасня на тэрыторыі сельгаспрадпрыемства ў вёсцы Рожкі-1 (Свіслацкі раён Гродзенскай вобласці) гарэла зернесушылка.
“Аграрыі праводзілі сушку насення сланечніку, — адзначаецца ў зводцы. — Аператар комплексу, адрэагаваўшы на водбліск пажару, выйшаў на вуліцу і выявіў, што з верхняй часткі шахтавай сушылкі выбівалася полымя. Мужчына адключыў падачу газу і вентылятары сушылкі”.
Агнём знішчана 35 тон насення, дэфармаваная металічная канструкцыя зернесушылкі. Паводле адной з версій, да пажару прывяло парушэнне тэхналагічнага рэгламенту сушкі.
У той жа вечар у вёсцы Бакі (Ваўкавыскі раён Гродзенскай вобласці) гарэў гусенічны экскаватар. Знішчаныя кабіна і абсталяванне маторнага адсека.
Напрыканцы мінулага тыдня МНС паведамляла пра ўзгаранне на складзе з двума прыбудаванымі навесамі ў аграгарадку Кавалі (Бабруйскі раён Магілёўскай вобласці). Пра характар пашкоджанняў не паведамлялася.
2,3 т саломы ў рулонах было знішчана агнём 25 верасня. Сцірта гарэла ў полі ля вёскі Бытча (Барысаўскі раён Мінскай вобласці).
Згодна з праведзеным “Позіркам” аналізам даных МНС, ад пачатку года праз пажары пацярпела або было знішчана прынамсі 37 адзінак сельгастэхнікі.
У 2025 годзе пацярпела або было знішчана не менш за 53 адзінкі. Гэта на 27,4% менш, чым за 2024 год (мінімум 73).
Намеснік начальніка галоўнага ўпраўлення нагляду і прафілактыкі МНС Дзяніс Жукоўскі 20 ліпеня паведаміў, што “найбольш распаўсюджанымі недахопамі ў забеспячэнні пажарнай бяспекі [падчас сельгасработ] з’яўляюцца незабеспячэнне гатоўнасці першасных сродкаў супрацьпажарнай абароны”: “Сёлета зафіксавана ўжо 228 такіх фактаў”.
Акрамя таго, выяўлена 63 факты “незабеспячэння суправаджэння збожжаўборачнай тэхнікі пажарнай аварыйна-выратавальнай альбо іншай прыстасаванай для тушэння пажараў тэхнікай”.
