Амаль палову аб’ёму ВУП забяспечылі з пачатку года Мінск і Мінская вобласць

18 верасня, Позірк. У студзені — жніўні 2026 года суб’екты гаспадарання Мінска і Мінскай вобласці забяспечылі амаль палову ўсяго аб’ёму валавога ўнутранага прадукту Беларусі, сведчыць праведзены “Позiркам” аналіз даных Нацыянальнага статыстычнага камітэта.

ВУП Беларусі за гэты перыяд павялічыўся на 1,9% у параўнанні з тым жа леташнім перыядам. У бягучых цэнах ён склаў 209 млрд 79,9 млн рублёў.

Валавы рэгіянальны прадукт:

Мінск — 64 млрд 176,2 млн, доля ў ВУП краіны — 30,7% (месяц таму — 31,3%), рост ВРП да студзеня — жніўня 2025-га на 1,6% (месяц таму рост у гадавым вымярэнні складаў 1,8%);

Мінская вобласць — 39 млрд 914,8 млн, 19,1% (18,9%), +2,6% (+2,8%) адпаведна;

Брэсцкая — 24 млрд 707 млн, 11,8% (11,7%), +3,4% (+4,3%);

Гомельская — 23 млрд 900,5 млн, 11,4% (11,4%), +1,6% (+2%);

Гродзенская — 21 млрд 350,9 млн, 10,2% (10,1%), +0,9% (+1,2%);

Віцебская — 19 млрд 37,3 млн, 9,1% (9%), +0,3% (-0,9%);

Магілёўская — 15 млрд 993 млн, 7,6% (7,6%), +0,9% (+1,1%).

У студзені эканоміка скарацілася на 1,2% да студзеня 2025-га (23,3 млрд рублёў), у студзені — лютым — на 1,2% да таго ж перыяду мінулага года (43,9 млрд), студзені — сакавіку — на 0,4% (68,2 млрд), студзені — красавіку — вырасла на 0,2% (94,5 млрд), студзені — траўні — на 0,9% (118,6 млрд), студзені — чэрвені — на 1,5% (149,6 млрд), студзені — ліпені — на 2,1% (180,5 млрд).

Паводле найважнейшых эканамічных прагнозных (дэ-факта планавых) параметраў на 2026 год, валавы ўнутраны прадукт павінен павялічыцца на 2,8%.

Прэм’ер-міністр Аляксандр Турчын 2 верасня пасля дакладу Аляксандру Лукашэнку заявіў, што ва ўрада “пэўны аптымізм у эканоміцы ёсць”. “І рост ВУП за сем месяцаў, і мы бачым тэндэнцыі да канца бягучага года. Фактычна ўсе галіны эканомікі выйшлі ў пазітыўную і станоўчую дынаміку. Але сітуацыя абсалютна неадназначная і ў разрэзе галін, і ў разрэзе асобных суб’ектаў гаспадарання“, — сцвярджаў чыноўнік.

Раней паведамлялася, што спажывецкія цэны ў жніўні 2026 года знізіліся на 0,1%, у параўнанні са снежнем 2025-га рост цэн склаў 3,1%, у гадавым вымярэнні (да жніўня 2025-га) цэны сталі вышэйшыя на 4,5%.

У кастрычніку 2025 года Міжнародны валютны фонд спрагназаваў у сваім аглядзе рост беларускай эканомікі ў 2026-м на 1,4%.

Еўрапейскі банк рэканструкцыі і развіцця ў верасні мінулага года пагоршыў свой прагноз на 2026-ы з 2,5% да 2,3%.

Еўразійскі банк развіцця чакае росту эканомікі Беларусі ў 2026 годзе на ўзроўні 1,5%.

Паводле звестак Белстата, аб’ём ВУП у 2025 годзе вырас на 1,3% (286,7 млрд рублёў) пры плане 4,1%. У студзені ён павялічыўся на 3,7% (20,5 млрд), студзені — лютым — на 3,1% (38,7 млрд), студзені — сакавіку — на 3,1% (59,4 млрд), студзені — красавіку — на 2,8% (81,4 млрд), студзені — траўні — на 2,5% (101,4 млрд), студзені — чэрвені — на 2,1% (129 млрд), студзені — ліпені — на 1,3% (155,2 млрд), студзені — жніўні — на 1,6% (180,1 млрд), студзені — верасні — на 1,6% (206,8 млрд), студзені — кастрычніку — на 1,5% (234,6 млрд), студзені — лістападзе — на 1,3% (258 млрд).

Па выніках 2024 года рост эканомікі склаўся на ўзроўні 4%, 2023-га — 3,9%. У 2022-м ВУП знізіўся на 4,7%, 2021-м — вырас на 2,3%, 2020-м — скараціўся на 0,9%.