Беларусь і Азербайджан пацвердзілі намер умацоўваць “сяброўскія сувязі” ў ваеннай сферы — Мінабароны

18 верасня, Позірк. Міністэрства абароны паведаміла 18 верасня аб “акрэдытацыйнай сустрэчы” начальніка дэпартамента міжнароднага ваеннага супрацоўніцтва — памочнік міністра абароны па пытаннях міжнароднага ваеннага супрацоўніцтва Валерыя Равенкі з азербайджанскім ваенным дыпламатам Айдынам Афтандзіл аглы Рагімавым.

Адзначаецца, што на сустрэчы абмеркаваныя пытанні двухбаковага вайсковага супрацоўніцтва, пры гэтым “бакі пацвердзілі гатоўнасць і ў далейшым актыўна садзейнічаць умацаванню сяброўскіх сувязяў паміж абароннымі ведамствамі дзвюх краін”.

Як паведамляў “Позірк”, 15 верасня міністр абароны Віктар Хрэнін на палях 13-га Пекінскага форуму ў пытаннях бяспекі “Сяншань” правёў сустрэчы з кіраўніком абароннага ведамства Азербайджана Закірам Гасанавым, з якім абмяняўся думкамі аб “вайскова-палітычным становішчы” і “абмеркаваў пашырэнне супрацоўніцтва ў пытаннях, якія ўяўляюць узаемную цікавасць”.

Супрацоўніцтва Беларусі і Азербайджана ў ваеннай сферы развіваецца на фоне астуджэння адносін з Арменіяй, пакуль яшчэ фармальна саюзніка Беларусі па Арганізацыі Дагавора аб калектыўнай бяспецы.

13 чэрвеня 2024 года прэм’ер-міністр Арменіі Нікол Пашынян заявіў, што ні ён, ні які-небудзь іншы афіцыйны прадстаўнік краіны не паедзе ў Беларусь, пакуль ва ўладзе ў Мінску знаходзіцца Аляксандр Лукашэнка. Кіраўнік армянскага ўрада сказаў пра гэта ў кантэксце заяў беларускага палітыка: Лукашэнка на перамовах з прэзідэнтам Азербайджана Ільхамам Аліевым 16 траўня таго года ў Баку прапанаваў “садзейнічанне ў пасляваенным аднаўленні тэрыторый”: “Якраз надышоў той цяжкі час, калі трэба адраджаць гэтыя землі, трэба вяртаць людзей. <…> Перамаглі, перамогу ўтрымалі, цяпер трэба адраджаць”.

Пасля заявы Пашыняна, 13 чэрвеня, амбасадар Арменіі ў Беларусі быў адкліканы ў Ерэван для кансультацый.

14 верасня гэтага года спікер Нацыянальнага сходу краіны Рубен Рубінян заявіў, што кансультацыі з амбасадарам Арменіі будуць працягвацца датуль, пакуль Мінск не прадставіць тлумачэнні або не прынясе прабачэнні за ранейшыя выказванні Лукашэнкі.