Консульскі аддзел амбасады Польшчы ў Мінску часова не будзе прымаць заявы па пытаннях “карты паляка”

30 ліпеня, Позірк. З 1 па 31 жніўня консульскі аддзел амбасады Польшчы ў Мінску (вул. Крапоткіна, 91A, Цэнтральны раён) не будзе прымаць заявы па пытаннях карт паляка, паведамляецца на афіцыйным урадавым партале краіны.

Гэта зроблена “па арганізацыйных прычынах”.

“Карта паляка” (Karta Polaka) — гэта афіцыйны польскі дакумент, які пацвярджае прыналежнасць чалавека да польскага народа.

Дакумент выдаецца грамадзянам краін былога СССР, якія не маюць польскага грамадзянства або пастаяннага віду на жыхарства ў краіне, але маюць польскія карані.

Раней консульскі аддзел амбасады Польшчы ў Мінску на нявызначаны тэрмін спыніў запіс па электроннай пошце ўладальнікаў “карты паляка”, якія жадаюць падаць дакументы для атрымання на яе падставе нацыянальнай візы.

Запіс быў прыпынены 1 чэрвеня “да моманту адмены гэтага рашэння”. Уладальнікам “карты паляка”, якія жадаюць звярнуцца за нацыянальнай візай, неабходна самастойна браніраваць даты праз сайт візавага пасярэдніка — кампаніі VFS Global (арганізуе працу польскіх візавых цэнтраў).