СК паведаміў пра выпадкі “вытворчага траўматызму” ў Віцебскай вобласці: у кіроўцы пагрузчыка пераломы галёнак, камбайнёр пазбавіўся пальцаў
22 ліпеня, Позірк. Пра два выпадкі “цяжкага вытворчага траўматызму” ў Віцебскай вобласці паведаміў 22 ліпеня Следчы камітэт.
Першы інцыдэнт адбыўся 15 ліпеня ў Полацкім раёне. Адзначаецца, што пры выкананні работ на тэрыторыі прадпрыемства 34-гадовы кіроўца пагрузчыка “здзейсніў наезд на перашкоду, страціў кантроль над кіраваннем спецтэхнікай і выпадкова пацягнуў рычаг руху каўша”.
“У выніку ногі мужчыны апынуліся заціснутыя паміж корпусам машыны і навясным абсталяваннем. На дапамогу пацярпеламу прыйшлі яго калегі: выкарыстоўваючы вуглавую шліфавальную машыну, яны дэмантавалі дзверы кабіны, дасталі пацярпелага і перадалі яго медыцынскім работнікам. У яго дыягнаставаныя пераломы абедзвюх галёнак”, — гаворыцца ў паведамленні.
Другі выпадак зафіксаваны 18 ліпеня ў Дубровенскім раёне. “Падчас завострывання нажоў здрабняльнага барабана кормаўборачнага камбайна 64-гадовы механізатар не пераканаўся ў закрыцці вечка заточнага механізму і прыступіў да зняцця стопару каленвала. Гэта прывяло да траўматычнай ампутацыі трох пальцаў рукі”, — паведамляе СК.
На месцах здарэнняў працавалі следча-аператыўныя групы. Следчыя, як адзначае ведамства, “правялі агляды, апыталі пацярпелых і відавочцаў, канфіскавалі неабходную дакументацыю”. Прызначаныя судова-медыцынскія экспертызы.
У красавіку 2026 года намеснік міністра працы і сацыяльнай абароны Алег Такун паведаміў, што за апошнія 20 гадоў вытворчы траўматызм у Беларусі скараціўся ў тры разы, смяротны — у два. Паводле яго слоў, у 2025-м зафіксаваны гістарычны мінімум колькасці смяротных выпадкаў на працы — 103.
Паводле даных Мінпрацы, асноўны фактар траўматызму — недапрацоўка наймальніка (недастатковая падрыхтоўка працоўных месцаў, адсутнасць распрацаваных інструкцый, навучання і інш.).
