РФ падключылася да судовага разбіральніцтва паміж Літвой і Беларуссю наконт мігрантаў

22 ліпеня, Позірк. Расія афіцыйна 20 ліпеня падключылася “ў якасці трэцяга боку ў пачатае ў 2025 годзе Літвой судовае разбіральніцтва супраць Беларусі на падставе Пратакола супраць незаконнага ўвозу мігрантаў, які дапаўняе Канвенцыю супраць транснацыянальнай арганізаванай злачыннасці”, паведамляе прэс-служба МЗС РФ.

Адпаведная дэкларацыя была пададзена ў Міжнародны суд ААН і апублікавана на яго сайце.

На думку Масквы, спробы “сказіць змест міжнародных дагавораў у мэтах ажыццяўлення “юрыдычнай вайны” супраць геапалітычных апанентаў падрываюць асновы міжнароднага права і прыводзяць да палітызацыі органаў міжнароднага правасуддзя”.

Удзел у разглядзе, сцвярджае МЗС, абумоўлены “добрасумленным намерам захаваць устойлівае карэктнае тлумачэнне задзейнічаных міжнародных дагавораў, пазбегнуць неапраўдана пашыральнай інтэрпрэтацыі, якая падрывае іх эфектыўнасць, і тым самым умацаваць іх прававы рэжым”.

19 траўня 2025 года стала вядома, што Вільнюс накіраваў у Міжнародны суд ААН (Гаага, Нідэрланды) заяву аб парушэнні Беларуссю сваіх абавязацельстваў у рамках Пратакола супраць незаконнага ўвозу мігрантаў па сушы, мору і паветры ад 15 лістапада 2000 года, які дапаўняе Канвенцыю ААН супраць транснацыянальнай арганізаванай.

Літва мяркуе, што гэты зварот дазволіць “захаваць тэму інструменталізаванай міграцыі ў парадку дня палітычных абмеркаванняў іншых краін”.

Вільнюс патрабуе ад Мінска больш за 200 млн еўра ў якасці кампенсацыі ўрону, прычыненага міграцыйным крызісам. Гэтая сума значыцца ў згаданым пазове.

Урад Літвы 3 чэрвеня 2026 года прыняў рашэнне аб выдзяленні Міністэрству юстыцыі 45,4 тыс. еўра на аплату юрыдычных паслуг у міждзяржаўнай справе супраць Беларусі аб “незаконным увозе мігрантаў”.

Як паведамляў “Позірк”, Служба аховы дзяржаўнай мяжы Літвы 19 ліпеня зафіксавала рэкордную за апошнія 55 дзён колькасць спробаў парушэння мяжы з боку Беларусі — 28.

З пачатку ліпеня Літва зарэгістравала 88 спробаў незаконнага пранікнення на сваю тэрыторыю з Беларусі — у 2,9 раза больш, чым за 19 дзён чэрвеня (30), і на 46,7% больш, чым за ўвесь ліпень мінулага года (60).

У цэлым за мінулы перыяд 2026 года актыўнасць мігрантаў з трэціх краін, якія спрабуюць трапіць у ЕС праз беларуска-літоўскую мяжу, у статыстычным выражэнні ў параўнанні з тым жа леташнім перыядам вырасла нязначна: 960 спроб супраць 941 (+2%).

Міграцыйны крызіс на граніцы Беларусі і краін ЕС прадаўжаецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.