Урад у 2,6 раза скараціў пералік тавараў, якія падлягаюць цэнаваму рэгуляванню

10 ліпеня, Позірк. Аб карэкціроўцы дзеючай з канца 2022 года сістэмы рэгулявання цэн паведаміў 10 ліпеня ўрад.

Адпаведную пастанову падпісаў прэм’ер-міністр Аляксандр Турчын.

“Адно з галоўных змяненняў — скарочаны пералік тавараў, якія падлягаюць цэнавому рэгуляванню, з 199 да 76 пазіцый (тавары непаўсядзённага попыту)”, — гаворыцца ў паведамленні.

Такім чынам спіс скараціўся ў 2,6 раза.

На думку ўрада, на ўнутраным рынку цяпер “адзначаецца стабілізацыя цэнавай сітуацыі”. Цэны “паказваюць ўмераны рост, што з’явілася падставай для паслаблення цэнавага рэгулявання”.

Сцвярджаецца, што скарачэнне пераліку “дасць магчымасць айчынным арганізацыям палепшыць эканамічнае становішча, праводзіць больш гнуткую цэнавую палітыку і вярнуць свае пазіцыі на ўнутраным рынку”. Пры гэтым заяўлена, што “ў выпадку з’яўлення прыкмет неабгрунтаванага росту цэн, цэнавае рэгуляванне на выключаныя тавары будзе адноўлена”.

Урад паведамляе, што з цэнавага рэгулявання выключаныя: малако, кефір, смятана ў шкляной тары, сумесавая гарбата, карамель на палачцы, жавальная гумка, экзатычныя плады цытрусавых.

Зменены памер устаноўленых гранічных максімальных надбавак на асобныя імпартныя і айчынныя тавары (малако, кефір, смятана, чай: чорны і зялёны). Ва ўрадзе мяркуюць, што пры гэтым “падвышэнне [цэн] на імпартныя тавары не паўплывае на рынак, бо айчынныя тавары займаюць упэўненую пазіцыю на ўнутраным рынку”.

“Устаноўлена цэнавае рэгуляванне на асобныя тавары (хлебабулачныя вырабы і раздзелка (мяса, рыба), вырабленыя ў аб’ектах грамадскага харчавання, якія належаць суб’ектам гандлю, што ажыццяўляюць раздробны гандаль”, — гаворыцца ў паведамленні. У прыватнасці, на гэтыя тавары ўласнай вытворчасці ўводзіцца абмежаванне нацэнкі (не больш за 10%) пры іх рэалізацыі праз раздробны гандаль.

Пастановай прадугледжаныя і іншыя карэкціроўкі, у тым ліку: устаноўлены перыяд самастойнага павышэння адпускных цэн (у мэтах выключэння магчымасці самастойнага павышэння вытворцамі адпускных цэн накапляльным вынікам за некалькі гадоў, максімальны перыяд для такога павышэння абмежаваны каляндарным годам).

Акрамя гэтага, суб’ектам гандлю прадастаўлена права “павялічваць выдаткі па фасоўцы на суму расходаў па абавязковай сертыфікацыі расфасаванай прадукцыі”.

“Асноўныя змены ўступаюць у сілу пасля афіцыйнага апублікавання пастановы ўрада, а нормы, якія тычацца цэнаўтварэння на тавары, што вырабляюцца ў аб’ектах грамадскага харчавання, — праз 10 дзён пасля яго”, — гаворыцца ў рэлізе.

Папярэдні (сёмы) раз пералік тавараў, якія падлягаюць цэнаваму рэгуляванню, скарачаўся з 211 да 199 пазіцый у пачатку снежня 2025 года (-5,7%). Гэта было прадугледжана пастановай урада ад 3 снежня 2025 года № 701.

6 кастрычніка 2022 года Аляксандр Лукашэнка па выніках нарады аб цэнавай сітуацыі ў краіне падпісаў дырэктыву № 10 “Аб недапушчальнасці росту цэн”.

Пастановай урада ад 19 кастрычніка 2022 года № 713 “Аб сістэме рэгулявання цэн” было ўведзена рэгуляванне цэн на тавары ўсяго спажывецкага кошыка. Пазней у дакумент неаднаразова ўносіліся змены: з яго былі выключаныя некаторыя групы тавараў, падкарэктаваныя правілы рэгулявання цэн.

Гл. таксама:

Інфляцыя з пачатку года склала 2,9%, у гадавым вымярэнні — 4,3%