Законапраект аб падпарадкаванні ўпаўнаважанага па справах рэлігій і нацыянальнасцей прэзідэнту прыняты ў першым чытанні — праз два тыдні пасля ўнясення ў ПП НС

25 чэрвеня, Позірк. Палатай прадстаўнікоў у першым чытанні 24 чэрвеня прыняты праект закона “Аб змене законаў па пытаннях дзейнасці Савета міністраў Рэспублікі Беларусь”, паведамляе прэс-служба ПП НС.

Сцвярджаецца, што ён падрыхтаваны “ў парадку дэпутацкай заканадаўчай ініцыятывы ў рамках рэалізацыі даручэння Аляксандра Лукашэнкі”.

У прыватнасці, праектам закона ўносяцца змены ў арт. 11 закона “Аб свабодзе сумлення і рэлігійных арганізацыях”, у адпаведнасці з якімі функцыі органа дзяржаўнага кіравання ў галіне свабоды сумлення, свабоды веравызнання і рэлігійных арганізацый ажыццяўляе Упаўнаважаны па справах рэлігій і нацыянальнасцей, які “падпарадкоўваецца прэзідэнту”. Агульнае кіраўніцтва ўпаўнаважаным па справах рэлігій і нацыянальнасцей ажыццяўляе Адміністрацыя прэзідэнта.

З закона аб Савеце міністраў выключаецца арт. 26, які рэгламентуе дзейнасць упаўнаважанага па справах рэлігій і нацыянальнасцей.

11 чэрвеня законапраект быў унесены ПП НС з прапановай змяніць інстытуцыйную падпарадкаванасць упаўнаважанага. Паводле актуальнай рэдакцыі закона “Аб свабодзе сумлення і рэлігійных арганізацыях”, ён “ажыццяўляе функцыі органа дзяржаўнага кіравання і падпарадкоўваецца Савету міністраў”.

У дзейным законе з пункта, які абвяшчае, што ўпаўнаважаны “прызначаецца на пасаду дзяржаўнага грамадзянскага служачага і вызваляецца ад гэтай пасады” прэзідэнтам па прапанове Савета міністраў, згадванне ўрада прапанавана выключыць. У той жа час праект дапаўняе закон нормай аб тым, што палажэнне аб упаўнаважаным зацвярджае прэзідэнт.

Законапраект, які змяняе падпарадкаванасць рэгулятара ў галіне рэлігіі, унёс у ніжнюю палату парламента старшыня пастаяннай камісіі ПП НС па дзяржаўным будаўніцтве, мясцовым самакіраванні і рэгламенце, дэпутат Слонімскай акругі № 58 (Гродзенская вобласць) Валянцін Семяняка.

З 21 снежня 2020 года пасаду ўпаўнаважанага па справах рэлігій і нацыянальнасцей займае Аляксандр Румак, які да гэтага назначэння быў намеснікам міністра працы і сацыяльнай абароны.

Многія вернікі і рэлігійныя дзеячы адкрыта выказваліся аб грамадска-палітычным крызісе, які ўзнік на фоне сфальсіфікаваных прэзідэнцкіх выбараў 2020 года і жорсткасці сілавікоў у дачыненні да ўдзельнікаў пратэстных акцый, у выніку чаго рэжым Аляксандра Лукашэнкі ўзмацніў кантроль за рэлігійнай сферай.

У 2023 годзе на заканадаўчым узроўні рэлігійным арганізацыям фактычна забаранілі праяўляць палітычную актыўнасць не ў фарватары ўладаў і абавязалі перарэгістравацца.

З пачатку восені 2020 года па 29 траўня 2026-га, паводле даных ініцыятывы “Хрысціянская візія“, з рэпрэсіямі ў Беларусі ў той ці іншай форме сутыкнуліся сама меней 93 хрысціянскія служкі (каталіцкага касцёла — 37, евангельскіх цэркваў — пяць).