ЕАБР прагназуе ўдвая меншы рост ВУП, чым запланавалі ўлады Беларусі

22 чэрвеня, Позірк. Асноўную падтрымку росту валавога ўнутранага прадукту Беларусі ў студзені — траўні “аказаў унутраны попыт”, гаворыцца ў штотыднёвым макрааглядзе Еўразійскага банка развіцця (ЕАБР).

Рост рознічнага тавараабароту, як заяўлена, “паскорыўся да 7,1% з 6,2% месяцам раней” (тут і далей у гадавым вымярэнні).

Інвестыцыі ў асноўны капітал “вярнуліся да росту”, падкрэслілі аналітыкі банка, адзначыўшы, што “за пяць месяцаў яны павялічыліся на 1,5% пасля зніжэння на 0,6% ў студзені — красавіку”. На думку ЕАБР, гэтаму садзейнічала “аднаўленне аб’ёмаў капітальнага будаўніцтва”.

“Ва ўмовах высокага спажывецкага попыту і аднаўлення інвестыцыйнай актыўнасці прагназуем рост ВУП Беларусі на 1,3% ў 2026 годзе”, — гаворыцца ў аглядзе.

Варта адзначыць, што згодна з найважнейшымі эканамічнымі прагнознымі (дэ-факта планавымі) параметрамі на 2026 год, вызначаным Аляксандрам Лукашэнкам, ВУП павінен павялічыцца на 2,8%.

Такім чынам, прагноз ЕАБР у 2,2 разы ніжэйшы за запланаваны ўладамі.

Паводле даных Белстата, аб’ём ВУП у 2025 годзе вырас на 1,3% (286,7 млрд. рублёў) пры плане 4,1%.