Амбасада Польшчы ў Мінску спыніла запісваць праз электронную пошту ахвочых звярнуцца па візу на падставе “карты паляка”
2 чэрвеня, Позірк. Консульскі аддзел амбасады Польшчы ў Мінску на нявызначаны тэрмін спыніў запіс праз электронную пошту трымальнікаў “карты паляка”, якія хочуць падаць дакументы для атрымання нацыянальнай візы, вынікае з паведамлення на афіцыйным партале гэтай краіны.
Адзначаецца, што запіс праз адрас [email protected] прыпынены з 1 чэрвеня “да моманту скасавання гэтага рашэння”.
Згодна з паведамленнем, трымальнікам “карты паляка”, якія хочцць звярнуцца па нацыянальную візу, неабходна самастойна рэзерваваць даты праз сайт візавага пасярэдніка VFS Global.
На кастрычнік 2025 года ў Польшчы было легалізавана сама меней 146 тыс. грамадзян Беларусі, паведамляла юрыст Алеся Пажыток, якая спецыялізуецца на міграцыйным праве.
Паводле яе слоў, гэтыя даныя не ўлічваюць беларусаў, якія знаходзяцца ў краіне на падставе віз, знаходзяцца ў чаканні дазволу на жыхарства або рашэння пра наданне міжнароднай абароны.
