МУС паведаміла пра затрыманне 21-гадовага жыхара Віцебскай вобласці, які “прытрымліваўся нацыяналістычных і пратэстных поглядаў”

14 траўня, Позірк. Супрацоўнікамі ГУБАЗіК МУС пры сілавой падтрымцы атрада спецпрызначэння “Віцязь“ унутраных войскаў затрыманы 21-гадовы жыхар Віцебскай вобласці, паведамляе Міністэрства ўнутраных спраў.

Паводле сцвярджэння ведамства, затрыманы “прытрымліваўся нацыяналістычных і пратэстных поглядаў”.

Заяўляецца, што ў сацсетках ён “пакідаў каментарыі і выявы аб прычыненні шкоды ветэранам Вялікай Айчыннай вайны, бо лічыў, што ў іх дзеяннях не было подзвігу“. Таксама мужчына “размяшчаў фотавыявы з партрэтам Адольфа Гітлера ў сацыяльных сетках з мэтай гераізацыі яго асобы”.

Распачатая крымінальная справа за “наўмысныя дзеянні, накіраваныя на распальванне сацыяльнай варожасці або варажнечы”, гаворыцца ў паведамленні.

Падрабязнасці пра “пратэстныя погляды” затрыманага ў рэлізе МУС не прыводзяцца.