У Заходняй Дзвіне ратавальнікі шосты дзень шукаюць “меркавана загінулага” мужчыну

13 траўня, Позірк. Аб пошуку ў Віцебску зніклага мужчыны 1963 года нараджэння паведаміла 13 мая Рэспубліканскае таварыства ратавання на водах (ТРВОД).

Пошукавыя працы вядуцца на рацэ Заходняя Дзвіна ў абласным цэнтры ў раёне Навалучанскага моста, гаворыцца ў паведамленні.

ТРВОД назваў зніклага “меркавана загінулым”.

Упершыню пра знікненне мужчыны ў Віцебскай вобласці арганізацыя паведаміла 8 траўня.

Тады адзначалася, што яго пошукі вядуцца “ў рэчышчы ракі Заходняя Дзвіна”. Месца не называлася.

Паводле інфармацыі ТРВОД, у 2025 годзе зарэгістравана 492 здарэнні на вадаёмах, у тым ліку 54 — з непаўналетнімі (у 2024-м — 586 і 75 адпаведна; -16% і -28%).

Праз утапленне загінула 278 чалавек (368; -24,5%), у тым ліку 12 непаўналетніх (22; -45,5%).