ЗША ціснуць на Літву з мэтай аднаўлення транзіту беларускага калію — СМІ са спасылкай на кіраўніка МЗС Будрыса
14 траўня, Позірк. ЗША аказваюць ціск на Літву з мэтай аднаўлення транзіту беларускіх угнаенняў праз яе тэрыторыю, паведаміў на закрытай сустрэчы з фракцыяй сацыял-дэмакратаў міністр замежных спраў Кястуціс Будрыс.
Як паведамляе са спасылкай на свае крыніцы LRT, Будрыс на сустрэчы выкарыстаў менавіта слова “ціск”.
Крыніцы паведамілі, што ціск аказваецца не толькі на Літву, але і на іншыя краіны рэгіёну, якія маглі б паслужыць “транзітнымі маршрутамі“. Аднак Літва лічыцца “найбольш прывабным маршрутам” для дастаўкі беларускіх угнаенняў да Балтыйскага мора.
Будрыс адзначыў, што ЗША і раней вывучалі варыянты транспарціроўкі ўгнаенняў. Адзін з такіх варыянтаў уключаў куплю ўгнаенняў амерыканскай кампаніяй у “Беларуськалія” і іх наступны рэбрэндынг як амерыканскіх тавараў. Таксама разглядаўся сцэнарый транспарціроўкі “па гуманітарных меркаваннях”.
Пры гэтым, як адзначаецца ў публікацыі, літоўскія афіцыйныя асобы заявілі, што транзіт беларускага калію абмежаваны санкцыямі Еўрапейскага саюзу, якія ў лютым былі падоўжаныя яшчэ на адзін год.
Па выніках сустрэчы з амерыканскай дэлегацыяй 19 сакавіка ў Мінску Аляксандр Лукашэнка памілаваў 250 вязняў, з якіх 235 дазволена застацца на радзіме, а 15 было вывезена ў Літву (трое пасля накіраваліся ў Польшчу). У адказ адміністрацыя прэзідэнта ЗША Дональда Трампа паабяцала зняць у Беларусі частку санкцый (з “Белінвестбанка“, Банка развіцця, Міністэрства фінансаў, “Беларуськалія“, Беларускай калійнай кампаніі).
Упраўленне па кантролі за замежнымі актывамі Міністэрства фінансаў ЗША (OFAC) 26 сакавіка афіцыйна зняло абмежаванні з “Беларуськалія“ і Беларускай калійнай кампаніі (БКК).
Нягледзячы на рашэнне ЗША аб зняцці санкцый з “Беларуськалія“ пазіцыя афіцыйнага Вільнюса па гэтым пытанні застаецца ранейшай, заявіў 19 сакавіка дарадца літоўскага прэм’ер-міністра Ігнас Дабравольскас.
Прэм’ер-міністр Літвы Інга Ругінене ў канцы сакавіка заявіла, што Вільнюс “можа разгледзець” магчымасць дыялогу з Мінскам на ўзроўні намеснікаў міністраў замежных спраў пры выкананні шэрагу ўмоў: спынення кантрабанды цыгарэт з дапамогай метэазондаў; вяртання ў краіну грузавікоў літоўскіх перавозчыкаў “без якіх-небудзь дадатковых збораў або штрафаў”; спынення міграцыйнага крызісу на мяжы.
Пры гэтым, як заявіла Ругінене, яна “ніколі ні на якім узроўні” не абмяркоўвала са спецпасланнікам прэзідэнта ЗША Джонам Коўлам транзіт з Беларусі ўгнаенняў — для гэтага “няма ўмоў”, бо ў дачыненні да беларускага калію дзейнічаюць санкцыі ЕС.
Перавозка ўгнаенняў праз літоўскую тэрыторыю магчымая толькі пасля прыняцця адпаведнага рашэння “ўсім блокам Еўрасаюза”, дадала палітык.
