Абмежаванні і забароны на наведванне лясоў дзейнічаюць у 15 раёнах

14 траўня, Позірк. Абмежаванні і забароны на наведванне лясоў, уведзеныя праз павышаную пажарную небяспеку, дзейнічаюць у 15 раёнах Беларусі, сведчыць інтэрактыўная карта на сайце Міністэрства лясной гаспадаркі.

Забаронена наведваць лясы ў пяці раёнах Гомельскай вобласці — Кармянскім, Чачэрскім, Веткаўскім, Добрушскім і Гомельскім.

Абмежаванні, якія азначаюць, што ў лясы нельга заязджаць на аўтамабілі і разводзіць там вогнішчы, але даступныя пешыя прагулкі і збор ягад і грыбоў, уведзеныя ў Буда-Кашалёўскім раёне (Гомельская вобласць), Краснапольскім, Слаўгарадскім, Касцюковіцкім, Хоцімскім, Клімавіцкім, Крычаўскім, Чэрыкаўскім (Магілёўская), Драгічынскім і Брэсцкім (Брэсцкая).

У астатніх 103 з 118 раёнаў хадзіць у лясы можна свабодна.

11 траўня абмежаванні і забароны на наведванне лясоў дзейнічалі ў 13 раёнах Гомельскай вобласці.