У першым квартале Беларусь у 1,5 раза павялічыла інвестыцыі за мяжу, замежныя ўкладанні ў краіну выраслі на 10%

14 траўня, Позірк. За студзень — сакавік 2026 года замежныя інвестары ўклалі ў рэальны сектар эканомікі Беларусі 3,3 млрд долараў — на 10% больш, чым за першыя тры месяцы 2025-га (3 млрд), сведчаць звесткі Нацыянальнага статыстычнага камітэта.

У выглядзе прамых замежных інвестыцый паступіла 2,9 млрд долараў (2,4 млрд; +20,8%).

У сваю чаргу Беларусь інвеставала за мяжу 2 млрд долараў (1,3 млрд; больш у 1,5 раза).

Белстат не назваў канкрэтныя краіны, з якіх і ў якія паступілі інвестыцыі.

За 2025 год замежныя інвестары ўклалі ў рэальны сектар эканомікі Беларусі 7,6 млрд долараў — на 10,1% больш, чым у 2024-м (6,9 млрд).

У справаздачы не ўлічваюцца банкі, нябанкаўскія крэдытна-фінансавыя арганізацыі, Банк развіцця, а таксама бюджэтныя арганізацыі.

Белстат больш за два гады запар не паказвае асноўныя краіны, з якіх паступілі інвестыцыі, а таксама дзяржавы, у якія інвеставалі беларусы.