Віцебская мытня спыніла вываз у РФ 80 тон груш
14 траўня, Позірк. З пачатку траўня віцебскія мытнікі “ўстанавілі чатыры факты незаконнай транспарціроўкі ў Расію свежых груш”, паведамляе Дзяржаўны мытны камітэт (ДМК).
Агульная вага прадукцыі перавысіла 80 тон, кошт склаў больш за 540 тыс. рублёў.
“Ва ўсіх выяўленых на беларуска-расійскім участку мяжы фактах перавозчыкамі выступалі індывідуальныя прадпрымальнікі і юрыдычная асоба з Беларусі”, — гаворыцца ў паведамленні.
Удакладняецца, што ў кіроўцаў трох грузавікоў адсутнічалі ўсе неабходныя дакументы на транспарціроўку прадукцыі, чацвёрты прадставіў для мытнага кантролю “не адпаведныя перавозцы дакументы”.
Па ўсіх фактах вядуцца адміністрацыйныя працэсы.
“Перавозчыкі выплацяць штраф у памеры да 50% ад кошту прадмета адміністрацыйнага правапарушэння”, — адзначае ДМК.
