Ціханоўская: Дзяды дакладна не змагаліся за тое, каб беларуская зямля станавілася пляцоўкай для чужой агрэсіі

9 траўня, Позірк. 9 траўня ёсць днём памяці, калі ўзгадваюць “тых, хто перамог нацызм у Другой сусветнай вайне, і тых, хто не вярнуўся дадому”, заявіла беларускі дэмакратычны лідар Святлана Ціханоўская ў 81-ю гадавіну Дня перамогі.

“У Беларусі няма сям’і, якую б вайна абмінула, — адзначыла яна. — Мы памятаем гэты подзвіг, і менавіта таму асабліва балюча бачыць, як памяць пра гэтую жахлівую вайну выкарыстоўваюць як прапагандысцкі інструмент, каб апраўдаць новую”.

На думку Ціханоўскай, сэнс гэтай даты “не ў парадах і вайсковай тэхніцы на вуліцах”, бо “дзяды і прадзеды хацелі, каб іх дзеці і ўнукі жылі звычайнае, мірнае жыццё; хадзілі ў школу, кахалі, працавалі, будавалі свае сем’і”.

“Яны дакладна не змагаліся за тое, каб беларуская зямля станавілася пляцоўкай для чужой агрэсіі, каб тут стаялі чужыя войскі, а з нашай краіны рабілі крыніцу пагрозы, — падкрэсліла дэмлідар. — Беларусь заўсёды была і павінна заставацца краінай, якая не пагражае суседзям і не дазваляе выкарыстоўваць сябе супраць іншых”.

“Сёння побач з намі Украіна зноў плаціць страшную цану за мір — за права жыць на сваёй зямлі, размаўляць на сваёй мове, будаваць сваё ўласнае жыццё. Мы бачым, як вайна забірае жыцці, разбурае дамы, разлучае сем’і”, — дадала яна.

Менавіта таму, лічыць палітык, памяць пра вайну мае “нагадваць <…> берагчы жыццё, а не прывучаць дзяцей да ваеннай формы, захапляць зброяй і нармалізаваць гвалт”. Памяць, упэўненая яна, мае вучыць адказнасці, спачуванню, сумленнасці, павазе да чалавека і да суседзяў, таму, што “вайна — гэта трагедыя, а мір — гэта тое, што трэба будаваць разам”.

“Сёння я схіляю галаву перад усімі героямі, перад загінулымі і ахвярамі гэтай вайны. І вельмі хачу, каб лепшай памяццю пра іх стала Беларусь, у якой чалавечае жыццё — найвышэйшая каштоўнасць”, — падсумавала Ціханоўская.

Аляксандр Лукашэнка ранкам 9 траўня разам з Уладзімірам Пуціным і шэрагам кіраўнікоў краін Азіі назіраў за вайсковым парадам на Краснай плошчы ў Маскве.

24 лютага 2022 года РФ пачала поўнамаштабную вайну супраць Украіны — найбуйнейшы з часоў Другой сусветнай вайны канфлікт у Еўропе. Рэжым Лукашэнкі надаў войску РФ тэрыторыю для нападу на суседнюю краіну ўзімку і ўвесну 2022 года, а пасля на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў. Паводле звестак расследавальнікаў, многія беларускія прадпрыемствы цяпер актыўна займаюцца вытворчасцю на карысць расійскага вайскова-прамысловага комплексу.