АПК прапануе юрыдычную і псіхалагічную дапамогу студэнтам ЕГУ
22 красавіка, Позірк. Аб’яднаны пераходны кабінет (АПК) заявіў, што гатовы аказаць студэнтам Еўрапейскага гуманітарнага ўніверсітэта ў Вільнюсе (ЕГУ) псіхалагічную і юрыдычную падтрымку.
У паведамленні палітычнай структуры адзначаецца, што студэнты ЕГУ могуць “смела звяртацца” да АПК з пытаннямі пра асабістую бяспеку і падарожжы, рызыкі для іх саміх і іх сям’яў, магчымы перавод або працяг навучання ў Еўрасаюзе.
“Калі вы разглядаеце магчымасць працягу навучання ў Літве, Польшчы або іншых краінах ЕС, альбо калі вы не ўпэўненыя, што рабіць далей, мы гатовыя дапамагчы вам арыентавацца ў варыянтах”, — гаворыцца ў паведамленні.
З улікам рэкамендацый “праваабарончых і лічбавых праваабарончых арганізацый” АПК параіў людзям, якія хаця б нейкім чынам маюць дачыненне да ЕГУ, пазбягаць паездак у Беларусь.
“Калі вы знаходзіцеся ў Беларусі або павінны туды паехаць, не насіце з сабой дакументы або прадметы, звязаныя з ЕГУ (студэнцкі білет, сертыфікаты, кантракты, фірмовыя матэрыялы), і не прад’яўляйце дыплом ЕГУ дзяржаўным органам або працадаўцам. Ачысціце свае лічбавыя сляды: выдаліце звязаны з ЕГУ кантэнт з прыладаў, якімі вы можаце карыстацца ў Беларусі; праглядзіце сацыяльныя сеткі на наяўнасць згадак, падпісак, лайкаў і рэпостаў, звязаных з ЕГУ, і выдаліце або схавайце іх”, — заклікала палітычная структура.
Таксама рэкамендуецца не паведамляць пра навучанне ў ЕГУ пры размове з беларускімі чыноўнікамі або сілавымі структурамі, не ўступаць у дыялог з падазронымі анлайн-акаўнтамі.
Зацікаўленым асобам прапанавана звяртацца па пытаннях ЕГУ на адрас прадстаўніцы АПК па моладзевай палітыцы Маргарыты Ворыхавай ([email protected]) альбо праз форму на адмысловым сайце. АПК запэўнівае, што кожны запыт будзе разглядацца “з увагай і захаваннем канфідэнцыяльнасці”.
14 красавіка 2026 года Вярхоўны суд Беларусі прызнаў ЕГУ і структурныя падраздзяленні з яго складу “экстрэмісцкай арганізацыяй”, чыя дзейнасць на тэрыторыі краіны забароненая. Пра гэта абвясціў Дзмітрый Брылёў — начальнік упраўлення Генеральнай пракуратуры, якая звярнулася ў суд з адпаведнай заявай на падставе закона “Аб супрацьдзеянні экстрэмізму”.
На наступны дзень міністр замежных спраў Літвы Кястуціс Будрыс назваў гэтае рашэнне абуральным, ахарактарызаваў яго як “чарговы варожы акт рэжыму [Аляксандра] Лукашэнкі супраць Літвы і ЕС” і выказаў гатоўнасць “падтрымаць супольнасць ЕГУ”.
16 красавіка МЗС Літвы выказала Беларусі “рашучы пратэст” у сувязі з прызнаннем ЕГУ “экстрэмісцкай арганізацыяй”. Знешнепалітычнае ведамства расцаніла гэтае рашэнне “як палітычна матываванае, неабгрунтаванае, яно парушае прынцыпы міжнароднага права, а таксама суверэнітэт Літоўскай Рэспублікі”. Выпадак, калі вышэйшая навучальная ўстанова, якая законна працуе ў іншай дзяржаве, абвяшчаецца “экстрэмісцкай арганізацыяй”, МЗС назвала беспрэцэдэнтным.
Гл. таксама:
Офіс Ціханоўскай гатовы супрацоўнічаць з ЕГУ і партнёрамі для захавання дзейнасці ўніверсітэта
